Հունիսի 20-21-ը ԴիջիԹեք Բիզնես Ֆորումին կմասնակցեն և տեխնոլոգիական լուծումներ կներկայացնեն ռուսական խոշորագույն կազմակերպություններ: Այս մասին տեղեկացնում են միջոցառման կազմակերպիչ ԻՏՁՄ մամլո ծառայությունից:
Գործարար համայնքը, տեխնոլոգիական նորություններով հետաքրքրվողները կծանոթանան «ԱՌինտեգ» ընկերության ծառայություններին, որը համակարգերի ինտեգրմամբ զբաղվող խոշորագույն ընկերություններից է Ռուսաստանում, ինչպես նաև հանդիսանում է ֆորումի հովանավորներից: Ընկերությունը տրամադրում է տեղեկատվության անվտանգության ապահովման արտադրանք և աջակցում է իր հաճախորդներին ձևավորելու ժամանակակից ՏՏ -ենթակառուցվածք նորագույն տեխնոլոգիաների, հուսալի ծրագրային և ապարատային ապահովման միջոցով:
Բիզնես ֆորումին իր ծառայությունները կներկայացնի նաև «Ասկոն» ընկերությունը, որը զբաղվում է ինժեներական ծրագրային ապահովման մշակմամբ և արտադրական ոլորտի ինտեգրատոր է: Ընկերությունը կոմպլեքսային ավտոմատացման ծառայություններ է մատուցում, որոնք ուղղված են լուծելու հետևյալ խնդիրները` ինժեներական նախագծերի փաստաթղթերի նախապատրաստում և թողարկում, բիզնես գործընթացների զարգացում և ինժեներական տվյալների կառավարում:
Միջոցառումը կազմակերպվում է Ինֆորմացիոն Տեխնոլոգիաների Ձեռնարկությունների Միության (ԻՏՁՄ) կողմից՝ ՀՀ վարչապետի բարձր հովանու ներքո: Գլխավոր հովանավորն է «ԱրմենՏել» ընկերությունը (ապրանքանիշը Beeline): Ֆորումի հովանավորներն են Կոնվերս բանկը և ռուսական «ԱՌինտեգ» ընկերությունը:
Ֆորումի մուտքն ազատ է:
