Քարդաշյանի այցն ու Հայաստանի մասին որոնումները, որոնք պայթեցրին Google-ը

Քիմ Քարդաշյանի Հայաստան կատարած այցն աննախադեպ կերպով իր վրա ուղղեց օտարերկրացիների ուշադրությունը և մեծ հետաքրքրություն առաջացրեց հայերի և հայաստանցիների նկատմամբ։ Google Trends-ը ֆիքսեց մեկ շաբաթվա ընթացքում Google-ում կատարված որոնումներում «Armenia» և այլ հարցումների հաճախականության աճը։

Օգտագործողները որոնում էին Քիմ Քարդաշյանի, Հայաստանի անունները ու նույնիսկ հետաքրքրվում, թե որտեղ է գտնվում Հայաստանը։ Ամբողջ աշխարհում որոնվող հայտնի մարդկանց անուններում այդ օրերին Քիմ Քարդաշյանը զբաղեցրեց երկրորդ տեղը․

Capture

Իսկ շատ հարցումներ նույնիսկ պայթեցրին ինտերնետը՝ Google Trends-ի կողմից որակվելով որպես «Breakout»: Ինչ վերաբերում է հայաստանյան օգտագործողների կողմից կատարվող հարցումներին, ապա վերջին մեկ շաբաթում Հայաստանից կատարվող որոնումները ստեղծեցին հետևյալ պատկերը․11149289_10153258174438781_7864341339142872826_n

168.am-ը գրում է, որ վերջին 1 շաբաթվա ընթացքում «Armenia» բառի փնտրումը Google համակարգով աճել է 60%-ով։ Իսկ հիմա շատ ավելի հետաքրքիր տվյալ` «Where is Armenia» արտահայտության փնտրումն աճել է 7.5 անգամ (650%-ով)։ Այսինքն՝ մարդկանց թիվը, ովքեր ցանկացել են իմանալ, թե որտեղ է Հայաստանը, բազմապատկվել է 1 շաբաթվա ընթացքում։ Սա հենց այն է, ինչի մասին խոսում էինք. Հայաստանի մասին թեկուզ անուղղակիորեն լուրեր կարդալով` մեծանում է հետաքրքրությունը մեր երկրի նկատմամբ։ «Kardashian Armenia» արտահայտության փնտրման հաճախականությունն աճել է 18.5 անգամ, «Kardashian in Armenia», «Kim in Armenia» փնտրումները` ավելի շատ։ Այնքան շատ, որ Google Trends-ում ճշգրիտ թվի փոխարեն` գրվում է «Breakout»:

 

Իսկ գծապատկեր 1-ը ցույց է տալիս, որ վերջին մեկ շաբաթում Google-ով Հայաստանի օրական փնտրումների քանակը եռապատկվել է` վերջին 3 ամսվա կտրվածքով։ Նույն ժամանակահատվածում «Armenian Genocide» փնտրման օրական հաճախականությունն աճել է 4-5 անգամ (գծապատկեր 1)։

gcap1-google

Ի դեպ, հայաստանյան օգտատերերը վերջին 1 շաբաթում ամենից շատ փնտրել են ոչ թե Քիմ Քարդաշյանին, այլ Քանիե Ուեսթին։ Սա խոսում է փոխադարձ հետաքրքրության կտրուկ աճի մասին։ Իսկ եթե ավելի կարճ ասենք` ինտեգրման։ Կարող եք համոզված լինել, որ փնտրման հաճախականությունն աճել է Ծիծեռնակաբերդի, Կասկադի, «Թումո» կենտրոնի, Մալխաս Ջազ ակումբի, անգամ «Դոլմամա» ռեստորանի նկատմամբ։ Մի խոսքով, շահել են բոլոր այն վայրերն ու ընկերությունները, ուր այցելել է Քիմն ու իր ընտանիքը։

Wikipedia «Քիմի էֆեկտը» բավականին լավ երևում է նաև Wikipedia օնլայն անվճար հանրագիտարանի վիճակագրությունից։ Այսպես` Wikipedia-ում անգլերեն լեզվով Հայաստանի էջը վերջին 1 ամսվա ընթացքում դիտվել է օրական միջինը 5000 անգամ։ Քիմը Հայաստան այցելեց ապրիլի 8-ին, և նույն օրը Wikipedia-ում անգլերեն լեզվով Հայաստանի էջի դիտումների քանակը հասավ 8208-ի։ Ապրիլի 9-ին թիվը հասավ 14 հազարի, 10-ին` 15600-ի։ Ապրիլի 11-ին ցուցանիշն ընկավ 9100-ի։ Իսկ հաջորդ օրը նոր ռեկորդ գրանցեց` 16830։ Իհարկե, ապրիլի 12-ին Հայաստանի նկատմամբ հետաքրքրության աճը հիմնականում պայմանավորված էր նաև Հռոմում մատուցված պատարագով, սակայն նախորդ օրերի ընթացքում Քարդաշյանների ներդրումն այս հարցում անուրանալի է։ Կոպիտ հաշվարկը ցույց է տալիս, որ Քիմ Քարդաշյանի այցելության օրերին` նրանց շնորհիվ, Wikipedia-ի Հայաստանի էջն ունեցել է շուրջ 35000 լրացուցիչ այցելու։ Այսինքն` այսքան մարդ ոչ միայն լսել է Հայաստանի մասին, այլև կոնկրետ հետաքրքրվել` փորձելով ինքնուրույն տեղեկություններ քաղել մեր երկրի մասին (գծապատկեր 2)։

gcap2-Armenia-Wiki

Հայոց ցեղասպանությամբ հետաքրքրվողների թիվը նույնպես մեծացել է: Մինչև Քարդաշյանների այցը անգլերեն լեզվով Հայոց ցեղասպանության մասին պատմող հոդվածն օրական ուներ միջինը 4500 դիտում։ Առավելագույնը եղել է 5300։ Ապրիլի 8-ին օրական դիտումների թիվը կազմեց 7300, ապրիլի 9-ին` 10800, ապրիլի 10-ին` 11300, ապրիլի 11-ին` 8400 (գծապատկեր 3)։

gcap3-Genocide-Wiki

Ապրիլի 12-ին Wikipedia-ի «Armenian Genocide» հոդվածն ունեցել է ռեկորդային` 31600 դիտում։ Իհարկե, այս ցուցանիշը գրանցվել է Հռոմի պատարագի շնորհիվ, սակայն նախորդող օրերի վիճակագրությունը նույնպես խոսում է այն մասին, որ Քարդաշյաններն այս հարցում քիչ դեր չեն խաղացել։

Սոցիալական ցանցեր

Սոցիալական ցանցերի ու դրանց ազդեցության մասին նշել ենք։ Այժմ փորձենք միայն Քիմ Քարդաշյանի օրինակով ցույց տալ, թե ինչ հսկա գործիքի մասին է խոսքը։ Քիմ Քարդաշյանի ֆեյսբուքյան էջն ունի 24 միլիոն հավանում։

Հայաստանում գտնվելու 5 օրերի ընթացքում նա իր էջում կատարել է կոնկրետ իր այցելությանը վերաբերող 8 գրառում` լուսանկարներով։ Այս 8 գրառումները միասին հավաքել են շուրջ 1.9 միլիոն հատ լայք և մի քանի հազար անգամ վերահրապարակվել են այլ օգտատերերի կողմից։

Instagram-ի էջն ավելի ակտիվ է։ Ունի 29.9 միլիոն հետևող։ Միայն Գեղարդի վանքում արված լուսանկարն այստեղ հավաքել է շուրջ 970 հազար լայք։ Իսկ ընդհանուր առմամբ, հայաստանյան այցի մասին պատմող գրառումները Քարդաշյանի Intagram-ի էջում հավաքել են շուրջ 6.5 միլիոն հատ լայք։

Twitter-ում Քիմ Քարդաշյանն ունի 31 միլիոնանոց լսարան, որտեղ նույն ակտիվությամբ գրառումներ է կատարում։ Իսկ այժմ եկեք հիշենք, որ Քիմից բացի, սոցիալական ցանցերում բազմիլիոնանոց լսարան ունեն նաև նրա քույրերը, ամուսինը, մայրը։ Այնպես որ, անհնար է հաշվել, թե նրանց սոցիալական ցանցերի միջոցով քանի տասնյակ միլիոն մարդ է իմացել հայերի ու Հայաստանի մասին։ Ընդամենը նշենք, որ, օրինակ, Twitter-ում #Armenia և #ArmenianGenocide հեշթեգերն աննախադեպ աճ են գրանցել Քարդաշյանների այցելության օրերին։ Ասենք, Armenia հեշթեգով կատարված գրառումների քանակն ապրիլի 8-ին հասել է 16 հազարի, այն դեպքում, երբ սովորաբար չէր անցնում 2-3 հազարից։