Օհանյան կրթահամալիրում առաջին դասարանից ներդրված են երեք առարկաներ` ինֆորմատիկա, գիտություն և ռոբոտաշինություն: Առաջին դասարանից սկսած ռոբոտաշինության ժամին աշակերտները զբաղվում են խոշոր լեգոներ հավաքելով, իսկ ավելի բարձր դասարաններում նրան հավաքում են ավելի մանր լեգոներ:
Կրթահամալիրի փոխտնօրեն Սոնա Միսկանյանը itTREND-ի հետ զրույցում ասաց, որ ինֆորմատիկայի դասերին աշակերտներն անցնում են տարրական ծրագրավորում, որի մակարդակը նույնպես բարդանում է աստիճանաբար: «Կրթահամալիրում գործում է նաև ռոբոտաշինության ակումբ, որտեղ կարող են հաճախել նաև այլ դպրոցների սաներ»,-ավելացրեց փոխտնօրենը:
Դիջիթեք Էքսպո 2014 ցուցահանդեսին կրթահամալիրի տաղավարը լի էր փոքրիկներով, որոնք մեծ ոգևորությամբ հավաքում էին լեգոներ` մեկը մյուսին հերթ չտալով:
Իսկ կրթահամալիրի սաները ներկայացնում էին նաև մի քանի ռոբոտներ, որոնցից մեկն արգելքի հանդիպելու դեպքում փոխում է շարժման ուղղությունը, իսկ մյուսը` փայլեցնում է հատակը:
