Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Հովիկ Աբրահամյանը: Նախքան նիստի օրակագային հարցերին անցնելը Հովիկ Աբրահամյանը նշել է. «Օրերս նորաստեղծ Տեղեկատվական և հաղորդակցության տեխնոլոգիաների գործատուների միությունն արձագանքեց Տեղեկատվական տեխնոլոգիաների զարգացմանն աջակցող խորհրդի վերջին նիստի արդյունքներով ձևավորված աշխատանքային խմբի մշակած մոտեցմանը, որն առաջարկում էր մասնավոր-պետություն համագործակցության հիման վրա, Ճարտարագիտական համալսարանի ներքո նոր՝ երրորդ սերնդի տեխնոլոգիական համալսարանի ստեղծում»:
Վարչապետը փոխվարչապետ Վաչե Գաբրիելյանին հանձնարարել է բոլոր շահագրգիռ գերատեսչությունների և ՏՀՏ-ի գործատուների միության հետ՝ միջազգային փորձագետների ներգրավմամբ քննարկել այս գաղափարը և ներկայացնել առաջարկություններ: «Կարծում եմ՝ նոր որակի համալսարանի ստեղծման գաղափարը ազգային ծրագրերի ներուժ ունի, և հարկ է այս հնարավորությունը պատշաճ կերպով օգտագործել»,-նշել է վարչապետը:
