Անցնող տարին Հայաստանի ՏՏ ոլորտի համար բավականին հագեցած էր և իրադարձություններով լի: Տարվա ընթացքում շրջանառությունը կազմել է ավելի քան 500 մլն ԱՄՆ դոլար, ընկերությունների քանակը հասել է շուրջ 540, ոլորտում ներգրավված է 16.000 մասնագետ, իսկ ՀՆԱ-ի վրա ՏՏ ազդեցությունը մոտ 6% է կազմել: itTrend-ը ներկայացնում է Հայաստանի ՏՏ ոլորտի հետաքրքիրն ու կարևորը՝ տարեսկզբից մինչև տարեվերջ:
Նյութի առաջին մասը կարող եք կարդալ այստեղ։
TIME ամսագիրը հայկական News Deeply հարթակն անվանեց «նորությունների ապագա»
News Deeply-ն հայերի կողմից ստեղծված լրատվական հարթակ է, որը ստեղծում է կոնկրետ թեմաներով բովանդակություն՝ դրանց շուրջ ներգրավելով մասնագիտացված ընթերցողների համայնքներ։ Աշխարհում բարդ, փոխկապակցված խնդիրների ցանց է աճում և ավելի շատ տեղեկատվություն է հոսում, քան երբևէ՝ ավելի շատ ձայներ կան, բայց նաև ավելի շատ աղմուկ, որտեղ ոչ բոլորն են վստահելի և պատշաճ։ Ստարտափը Ձեռնարկությունների ինկուբատոր հիմնադրամի կազմակերպած Նորարարության զարգացման հանաֆինանսավորվող դրամաշնորհային մրցույթի հաղթողներից է։
Գեղարքունիքի մարզի դպրոցներում բացվեցին ինժեներական խմբակ-լաբորատորիաներ
Ինֆորմացիոն տեխնոլոգիաների ձեռնարկությունների միության (ԻՏՁՄ) նախաձեռնությամբ և Վորլդ Վիժն Հայաստանի աջակցությամբ Գեղարքունիքի մարզի 4 դպրոցում սկսեցին գործել ինժեներական ժամանակակից լաբորատորիաներ: Լաբորատորիաները գտնվում են Մեծ Մասրիկ, Լուսակունք, Մարտունի համայնքների միջնակարգ և Գավառի թիվ 8 դպրոցներում:
PicsArt-ը դարձավ HyeTech Showcase 2016-ի և Entrepreneur Immersion Program-ի հրեշտակ ներդրողներից մեկը
HyeTech Showcase-ը տեղի է ունենում ամեն տարի ԱՄՆ-ի Բերկլիի համալսարանում, որի ժամանակ ավելի քան 30 հայկական ստարտափեր հնարավորություն են ունեցում ներկայացնել իրենց պրոդուկտները և կիսվել միմյանց հետ փորձով: Այնտեղ իրենց ելույթներով հանդես են եկել այնպիսի ընկերությունների հիմնադիրներ, ինչպիսիք են Viki-ն, Service Titan-ը, Kanjoya-ն, Joomag-ը և CodeFights-ը:
Ապրիլից դադարեց գոյություն ունենալ «Օրանժ» անունով բջջային օպերատորը
2015 թվականին «Յուքոմ» ընկերությունը ձեռք բերեց «Օրանժ Արմենիայի» 100 տոկոս բաժնետոմսերը՝ այդպիսով ընդլայնելով իր ծառայությունները դեպի բջջային կապի և շարժական իներնետի ծառայությունների տրամադրում: 2016-ին տեղի ունեցավ բրենդի վերջնական փոփոխումը։
Տեղի ունեցավ «BrainLab» բիզնես հարթակի առաջին հանդիպումը
Ինֆորմացիոն տեխնոլոգիաների ձեռնարկությունների միությունը (ԻՏՁՄ) սկիզբ է դրել նոր, «BrainLab» կոչվող հարթակի գործարկմանը: «BrainLab»-ը բիզնես հանդիպումների ոչ պաշտոնական ֆորմատ է: Այն անցկացվում է միջազգային և տեղական առաջատար կազմակերպությունների ղեկավարների փորձի փոխանակման, բիզնես հարաբերությունների ստեղծման ու զարգացման նպատակով:
Ապրիլի 16-ին տեղի ունեցավ «Ական փնտրող ռոբոտներ» մրցույթի եզրափակիչը
Ապրիլի 16-ին Երևան էքսպո կենտրոնում (Հ. Հակոբյան 3, Մերգելյան ինստիտուտ) տեղի ունենցավ «Ական փնտրող ռոբոտներ» մրցույթի եզրափակիչ փուլը:
Մրցույթի մասնակից ռոբոտները պետք է խոչընդոտները շրջանցելով գտնեին արհեստական խոտածածկի տակ մինչև 3 սմ խորության վրա պահված ականները, ֆիզիկապես նշեին դրանց գտնվելու վայրը և դրանց դասավորությամբ էլեկտրոնային քարտեզը ուղարկեին սերվերին:
Հայկական ստարտափի ստեղծած խելացի բաժակը IndieGoGo-ում հավաքեց 186,000 դոլար
Yecup 365-ը առաջին բաժակն է, որի ջերմաստիճանը կարելի է կարգավորել օգտատիրոջ նախասիրությամբ՝ կախված եղանակից: Հատուկ հավելվածի միջոցով ձմռանն այն տաքացնում է ըմպելիքը, իսկ ամռանը սառեցնում այն: Yecup 365-ն ունի ջերմաստիճանի լուսային ցուցիչ, լիցքավորվում է լարով կամ անլար եղանակով, նախատեսված է նաև, որ այն հնարավոր լինի լիցքավորել մեքենայի մեջ ու բաժակը հարմարավետ տեղափոխել:
Հայաստանում ներդրվեց պաշտոնական էլեկտրոնային փոստարկղի համակարգ
«ԷԿԵՆԳ» ՓԲԸ-ն Հայաստանում գործարկել է e-citizen.am տիրույթում գործող պաշտոնական էլեկտրոնային փոստարկղի համակարգը, որը հանդիսանում է պաշտոնական միջոց հաղորդակցությունն ու ծանուցումներ ստանալու համար:
Այս տարվանից ի վեր ՀՀ բոլոր քաղաքացիները կարող են ունենալ պաշտոնական էլեկտրոնային հասցե, որը շնորհվում է նույնականացման քարտի թողարկման պահից և համարվում է անվճար ծառայություն: Քաղաքացին նույնիսկ կարող է ծանուցումը վերահասցեագրել ցանկացած այլ (մինչեւ 3) էլեկտրոնային փոստի հասցեի կամ բջջային հեռախոսահամարի՝ կարճ հաղորդագրության (SMS) միջոցով: Յուրաքանչյուր էլեկտրոնային հասցեն բաղկացած է քաղաքացու հանրային ծառայությունների համարանիշից, ինչը հնարավորություն է տալիս նրան ուղարկել պաշտոնական ծանուցում, եթե նույնիսկ անհայտ է տվյալ անձի փաստացի բնակվելու հասցեն:
Գործարկվեց առաջին հայկական չաթ-բոթը
Հայկական Truthly.me սոցիալական հարթակը, որը հնարավորություն է տալիս անանուն կարծիքներ հայտնել կազմակերպություններին և կարծիքներ ստանալ ընկերներից, համալրվել է նոր հնարավորությամբ: Truthly-ի ֆեյսբուքյան էջի նամակներին այժմ պատասխանում է բոթը։
Հուլիսի 1-ից Երևան քաղաքում սկսեց գործել Yandex Taxi-ն
Yandex Taxi-ն, որը թույլ է տալիս բջջային հավելվածի միջոցով օնլայն տաքսի պատվիրել, Երևանում սկսեց գործել հուլիսի 1-ից։ Այս մասին Բարքեմփ 2016-ին առաջին անգամ հայտարարեց Yandex Taxi-ի մարքետինգի գծով տնօրեն Դանիլ Շուլեյկոն։
Yandex Taxi-ն առանձնացավ շուկայում նրանով, որ առաջարկեց 100 դրամ մինիմալ վճար՝ առաջին 2 կիլոմետրի համար (+100` յուրաքանչյուր հաջորդ կիլոմետրը)։ Սկզբնական շրջանում վարորդներից կոմիսիոն վճարներ չեն գանձվել։
Արդեն 3-րդ անգամ տեղի ունեցավ SeedStars Armenia մրցույթը
Մայքրոսոֆթ ինովացիոն կենտրոնը Հայաստանը Ձեռնարկությունների ինկուբատոր հիմնադրամի և Ինովացիոն լուծումների և տեխնոլոգիաների կենտրոնի հետ համատեղ հունիսի 25-ին Հայաստանի Ամերիկյան Համալսարանում կազմակերպեց Seedstars միջազգային մրցույթի երևանյան փուլը։ Այս տարի մրցույթին մասնակցելու հայտ էր ներկայացրել 66 թիմ:
Տեղական փուլում հաղթող ճանաչվեց Earlyone թիմը, որի ստեղծած պրոդուկտն ուղղված է հաճախորդների սպասարկման բարելավմանը։
«Արմաթ» ինժեներական լաբորատորիա հիմնվեց նաև Արցախում
Հուլիսի 7-ին՝ Արցախի տեղեկատվական տեխնոլոգիաների կենտրոնում (ԱՏՏԿ) Ինֆորմացիոն տեխնոլոգիաների ձեռնարկությունների միության (ԻՏՁՄ) և Ucom ընկերության աջակցությամբ բացվեց Արցախի առաջին (իսկ ՀՀ ամբողջ տարածքում` 131-րդ) «Արմաթ» ինժեներական լաբորատորիան: Նախաձեռնությունն իրականացվեց ԻՏՁՄ–ի և Ucom ընկերության միջև ստորագրված համագործակցության հուշագրի համաձայն՝ ըստ որի Ucom ընկերությունը ներդրումներ է կատարում՝ ուղղված հայ դպրոցականների տեխնոլոգիական կրթության բարելավմանը:
Թումո Երևանումում տեղի ունեցավ Wolfram Research-ի ամառային ճամբարը
Wolfram Research-ը աշխարհի ամենաառաջադեմ համակարգչային, վեբ և քլաուդ ծրագրային ապահովման ընկերություններից է: Դրա Wolfram Language ծրագրավորման լեզուն հեղափոխել է ոլորտը՝ առաջարկելով հաշվարկումն ու գիտելիքը միավորելու նոր ձև: Այս տարի ընկերության կողմից կազմակերպվող ամենամյա ամառային դպրոցը տեղի ունեցավ Թումոյում։
Կայացավ առաջին Sevan Startup Summit-ը
Օգոստոսի 18-ին մեկնարկեց Sevan Startup Summit միջոցառումը, որը կազմակերպվել էր Startup Armenia Foundation-ի կողմից: Վրանային ձևաչափ ունեցող համաժողովը տևեց 7 օր ու տեղի ունեցավ Սևանի ազգային պարկում:
Մրցույթին մասնակցելու համար նախապես ներկայացվել էր 96 նախագիծ, որոնցից ընտրվել էր 30-ը: Ներկայացված բիզնես-ծրագրերից լավագույն երկուսը ստանացան դրամաշնորհներ`25, 000 և 5000 դոլարի չափով:
inno4health-ի հաղթող նախագիծ ճանաչվեց PanDoc-ը
Հուլիսին անցկացված inno4health նորարար գաղափարների մրցույթում հաղթող էր ճանաչվել Սաթենիկ Գրիգորյանի թիմը, որը ներկայացրել էր պայմանական PanDoc անունով հավելվածը: Այն օգնում է քաղաքացիներին պարզ հարցերին պատասխանելու միջոցով պարզել իրենց առողջական խնդրի հավանական պատճառը և գտնել համապատասխան մասնագետ:
Menu.am-ը մուտք գործեց բելառուսական շուկա
Համակարգը գործարկվեց Բելառուսում menu.by հասցեոով:
Նշենք, որ սննդի պատվիրման միասնական համակարգը գործում է նաև Վրաստանում: Ընկերությունն իր ընդլայնման ռազմավարության շրջանակներում 2015-ի նոյեմբերին ավարտեց մոտ 720,000 ԱՄՆ դոլարի չափով ներդրումների ներգրավման գործընթացը:
Հայկական HY Pictures ստարտափը մրցանակ ստացավ World StartUp Cup 2016-ում
Օգոստոսի 3-5-ը Վաշինգտոնում անցկացված World StartUp Cup 2016-ում HY Pictures հայկական ստարտափը զբաղեցրեց 3-րդ տեղը: World StartUp Cup 2016-ը եռօրյա ինտերակտիվ միջոցառումների շարք է, որը ներառում է «Մենք ստեղծում ենք» խորագրով գագաթաժողովը:
HY PICTURES-ը գործունեություն սկսել է ծավալել որպես ֆիլմ արտադրող ընկերություն: NOLALAND-ը HY PICTURES-ի նախաձեռնությունն է, որի շրջանակներում պատրաստվել են 3 գրաֆիկական նովելներ, այդ թվում նաև Գրիգոր Զոհրապի «Ռեհան» ստեղծագործությունը:
«Արմաթ»-ը, Synergy-ն ու Localz-ը ՏՏ համաշխարհային համաժողովում մրցանակների արժանացան
«Արմաթ» ինժեներական լաբորատորիաները WITSA Global Excellence Award մրցանակաբաշխությունում «Կայուն զարգացման» (Sustainable growth) անվանակարգում արժանացավ մրցանակի: Մրցանակաբաշխությունն ավանդակաբար անցկացվում էր 6 անվանակարգում ՏՏ համաշխարհային համաժողովի (WCIT) շրջանակում` Տեղեկատվական տեխնոլոգիաների և ծառայությունների համաշխարհային ալյանսի (WITSA) կողմից:
Հիշեցնենք նաև, որ WCIT 2019-ը կանցկացվի Հայաստանում Ինֆորմացիոն տեխնոլոգիաների ձեռնարկությունների միության (ԻՏՁՄ) նախաձեռնությամբ և ՀՀ կառավարության աջակցությամբ:
Երևանում բացվեց «ArmHiTec-2016» միջազգային ցուցահանդեսը
«Երևանէքսպո» ցուցահանդեսային համալիրում հոկտեմբերի 13-ից 15-ը անցկացվեց Սպառազինությունների և պաշտպանական տեխնոլոգիաների «ArmHiTec-2016» առաջին միջազգային ցուցահանդեսը:
Ցուցահանդեսի նպատակն էր ներկայացնել Հայաստանի Հանրապետության և այլ երկրների նորագույն ռազմական տեխնիկան, ռազմարդյունաբերության նորարարական մշակումները:
Հայկական SoloLearn-ը $1.2 միլիոն դոլար ներգրավեց
SoloLearn հայկական հավելվածը, որը սովորեցնում է ծրագրավորում, ՏՏ և այլ հմտություններ, ստացել էր $1.2 միլիոն դոլար սաղմնային ֆինանսավորում: Ֆինանսավորման փուլը վարել է Valley VC Learn Capital ընկերությունը, որին միացել էին այլ ընկերություններ ևս, որոնց անունները չեն հրապարակվում:
Ընկերությունը հիմնվել է 2014 թվականին և ստեղծել մի շարք հավելվածներ շուկայի առաջատար հարթակների համար, որոնք համատեղում են հակիրճ ուսումնական նյութերը հետաքրքիր հարցերի և պրակտիկայի հետ:
Տեղի ունեցավ Վանաձորի տեխնոլոգիական կենտրոնի պաշտոնական բացումը
Հոկտեմբերի 29-ին կայացավ Վանաձորի տեխնոլոգիական կենտրոնի (ՎՏԿ) պաշտոնական բացման արարողությունը, որին ներկա էին ՀՀ Նախագահ Սերժ Սարգսյանը, ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, ՀՀ տնտեսական զարգացման և ներդրումների նախարար Սուրեն Կարայանը, Լոռու մարզպետ Արթուր Նալբանդյանը, Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, ՏՏ ոլորտի այլ ներկայացուցիչներ ու հյուրեր:
Բացվեց ISTC ինովցիոն լուծումների և տեխնոլոգիաների կենտրոնը
ԵՊՀ-ում նոյեմբերի 10 կայացավ գերժամանակակից տեխնիկայով հագեցած և «IBM» տեխնոլոգիական լուծումներով համալրված «ISTC» ինովացիոն լուծումների և տեխնոլոգիաների նոր կենտրոնի բացումը: ISTC կենտրոնի շնորհիվ Հայաստանի համար մատչելի կդառնա միջազգային գիտելիքը և ֆինանսավորման աղբյուրները, կվերապատրաստվեն շուկայի պահանջներին համապատասխան բարձրակարգ ՏՏ մասնագետներ, իսկ տեղական ընկերությունների համար կստեղծվի գլոբալ ցանցերում ընդգրկվելու հնարավորություն: Նշենք, որ ISTC կենտրոնը ՀՀ Կառավարության, IBM-ի, ԱՄՆ ՄԶԳ-ի և ՁԻՀ-ի համատեղ ծրագիրն է, որի գործունեությունը ուղղված է Հայաստանում նորագույն տեխնոլոգիաների լուծումների ներդրմանը: Կենտրոնն իր գործունեությունը ծավալում է 2014 թ.-ից:
Մեկնարկեց YerevaNN հետազոտական լաբորատորիայի գործունեությունը և թողարկվեց deep learning -ի ուղեցույց
Երևանում արդեն գործում է «ԵրևանԷն» (YerevaNN) հետազոտական լաբորատորիան, որտեղ զբաղվում են մեքենայական ուսուցման (machine learning) խնդիրներով: «ԵրևանԷն» գիտակրթական հիմնադրամի նպատակներից են արհեստական ինտելեկտի վերաբերյալ բարձրակարգ հետազոտությունների խթանումը և մեքենայական ուսուցման ու հարակից թեմաների որակյալ դասավանդումը Հայաստանում: Դեկտեմբերին գործարկեցին խորը ուսուցման (deep learning) ուղեցույց, որը կօգնի արագ կողմնորոշվել deep learning ուսումնասիրելիս: Այստեղ YerevaNN-ի թիմը փորձել է ծածկել դրա գրեթե բոլոր ենթաճյուղերը, բացի deep reinforcement learning-ի: Ոիղեցույցը մեծ արձագանք գտավ միջազգային ու տեղական հարթակներում: Վերջին շաբաթվա ընթացքում էլ այն Reddit-ի Machine Learning-ի բաժնի վերջին յոթ օրերի top թեմաների ցակում է ընդգրկվել:
PicsArt-ը ընդգրկվեց 2016-ի լավագույն հավելվածների ցանկում
CNet-ի կազմած ցանկում հայկական PicsArt-ը 2016‐ ի լավագույն iOS հավելվածներից մեկն է: Իսկ ահա լուսանկարներ մշակելու, խմբագրելու, կոլաժներ պատրաստելու հավելվածների շարքում այն ճանաչվել է լավագույնը:
2016-ի լավագույն հավելվածների շարքում ընդգրկված էին նաև Viber-ը՝ հաղորդակցության, Dark Sky-ը՝ եղանակի, Fitbit-ը՝ ֆիթնեսով զբաղվողների համար: Spotyfy-ն էլ լավագույն երաժշտական հավելվածն է ճանաչվել: iPhone-ի համար PicsArt-ի հետ համատեղ լուսանկարների խմբագրման ամենալավ հավելվածների շարքում առանձնացված էին նաև Enlight-ը , YouCam Perfect-ը և Camera+ -ը:
Կայացավ բիզնես ինովացիոն երկօրյա ֆորումը
Նոյեմբերի 18-ին Դիլիջանում մեկնարկել է Բիզնես ինովացիոն երկօրյա ֆորումը՝ «Հայաստան 20.18 – 2018թ.՝ Հայաստանը 20 ամենանորարար երկրների շարքում» խորագրով:
Ֆորումի նպատակն էր մինչև 2018թ. Հայաստանը ամենաինովացիոն երկրների շարքում 60-ից բարձրացնել 20-րդ հորիզոնական: Բիզնես ինովացիոն ֆորումի ընթացքում քննարկվել և մշակվել են Հայաստանի ինովացիոն զարգացման ռազմավարությունը: Ռազմավարության մշակման հիմնական ուղղությունները կրթության, ձեռներեցության և տեխնոլոգիական առաջխաղացումն է Հայաստանում:
Գործարկվեց Երևանի առաջին պանորամային քարտեզը
Արդեն հնարավոր է տեսնել ու վիրտուալ շրջել Երևանի գրեթե բոլոր փողոցներով ու բակերով, գուցե գտնեք նաև ձեզ կամ էլ ձեր մեքենան: Թողարկվել է Երևանի առաջին պանորամային քարտեզը, որի միջոցով հնարավոր է հեշտորեն գտնել ցանկացած հասցե, տեսնել շրջակայքը: Քարտեզը հասանելի է 3 լեզուներով:
ChessFimee հավելվածը դարձավ Armenian StartUp Cup-ի հաղթող
ChessFimee հայկական հավելվածը հաղթել է Armenian StartUp Cup մրցույթում: Այն 156 մասնակիցների շարքում ընդգրկվել էր Հայաստանի 12 քաղաքներից ընտրված լավագույն 15 սթարթափերի շարքում և դարձել գավաթակիր:
Chessfimee-ի նպատակն է դյուրին դարձնել շախմատ սովորելու պրոցեսը: Այն նախատեսված է թե՛ սկսնակների և թե՛ արդեն պրոֆեսիոնալ շախմատիստների համար:
Թողարկվեց հայկական արտադրության առաջին խելացի ժամացույցը՝ TSD Flex Smart Watch
«Technology & Science Dynamics TSD» ընկերությունը ներկայացրեց հայկական առաջին խելացի ժամացույցը:
Առաջին հայկական խելացի ժամացույցը 53.2 x 47 x 15.9մմ չափի է, այն գործում է Android 5.1 օպերացիան համակարգով, ունի 1,3 ԳՀց հաճախականությամբ MTK6580M պրոցեսոր, 512Մբ օպերատիվ հիշողություն, ներքին 8 Գբ հիշողություն: Տեսախցիկը 5 Մպ է, մարտկոցը՝ 400 մԱ/ժ:
Հրապարակվեց Սամվել Մարտիրոսյանի «Անձնական կիբեռանվտանգության հիմունքներ» գիրքը
Աշխատությունում ներկայացված են կիբեռանվտանգության այն հիմունքները, որոնք թույլ կտան համակարգչային օգտատերերին հնարավորինս խուսափել վիրտուալ ոլորտում արդեն սովորական դարձած հարձակումներից և տարաբնույթ այլ վտանգներից։
Վաճառքում հայտնվեցին առաջին հայկական VR ակնոցները
Հայկական ARLOOPA ընկերությունը, որը հայտնի է AR և VR վիդեոխաղերի և տեսահոլովակների ստեղծմամբ, մեկնարկել է առաջին հայակական VR ակնոցների վաճառքը։ Ակնոցները թույլ են տալիս դիտել 360 աստիճան տեսահոլովակներ և խաղալ VR խաղեր։
Arloopa VR ակնոցները հնարավոր է պատվիրել Menu.am-ից, ինչպես նաև գնել Electronic Planets և Kargin Optics խանութներից:
Տեղի ունեցավ Devfest Armenia 2016 կոնֆերանսը
Նոյեբերի 20-ին Թումո կոնտրոնում անցավ Devfest Armenia 2016 կոնֆերանսը, որին գրանցվել էին ռեկորդային թվով մասնակիցներ։ Կոնֆերանսի հիմնական նպատակը տեխնոլոգիական աշխուժություն ապահովելն ու համաշխարհային տեխնոթրենդերից հետ չմնալն է։
Հայկական պատվիրակությունը Թիֆլիսում կայացած GITI 2016-ից վերադարձավ հաղթանակած
Պատվիրակության կազմում ներառված էր 35 ներկայացուցիչ 26 մասնավոր և պետական կառույցներից, ինչպես նաև միջազգային կազմակերպություններից:
Պատվիրակության աշխատանքները ղեկավարում էր ԱՐՄԻՔՍ Հիմնադրամը՝ համակարգելով այն ԻՏՁՄ եւ ՏՀՏ Գործատուների Միության հետ։
Նյութի առաջին մասը կարող եք կարդալ այստեղ։
