Չնայած բավական ժամանակ է անցել, բայց Facebook սոցիալական ցանցի շուրջ ծավալվող սկանդալի չի խամրում։ Ընկերությունը մի շարք նորարարություններ է գործարկում իր սոցցանցում օգտատերերի անվտանգությունը պահպանելու և երբեմնի վստահությունը հետ բերելու համար։ Facebook-ն անգամ իր մյուս հարթակներում` WhatsApp, Intsagram ծառայություններում էլ անձնական տվյալների գաղտնիության պահպանման ուղղությամբ աշխատում։
Ընկերությունն ինքն էլ ներքին որոշ կանոններ է մշակել օգտատերերի հաշիվներն անվտանգ դարձնելու համար։ Պետք է ուղղակի հետևել դրանց։
Առաջին հերթին պետք է մտածել բարդ ու դժվար կոմբինացիայով գաղտնաբառ ունենալու մասին։ Երկար ու կարճ լինելը խնդիր չէ, պարտադիր է, որ գաղտնաբառի մեջ լինեն և՛ տառեր, և՛ թվեր։
Երկրորդ` պետք չէ ընդունել ցանկացած մարդու ընկերության հայտը։ Այո՛, շատ հավանումներ, ընկերներ ու մեկնաբանություններ ունենալու գաղափարը հետաքրքիր ու խոստումնալից է թվում, բայց դրանց մեջ կարող են լինել նաև հաքերների ստեղծած կեղծ հաշիվներ, իսկ հայ օգտատերերի պարագայում ադրբեջանական էջեր` քողարկված հայկական անունների տակ։ Ընդունելով նրանց ընկերության հայտը` թեև մասամբ, բայց նրանց հասանելի է դառնում որոշակի տվյալներ օգտատիրոջ մասին` լուսանկարներ, անձնական հաշվում նշված տարեթևեր, անուն, ինստագրամյան էջ և այլն։
Պետք է անպայման կոնֆիդենցիալ դարձնել էջի տեղեկատվությունը` հրապարակումներ, որոնք լայն մասսաների համար են և հատուկ ընկերների համար նախատեսվածները։ Այն կարելի է կարգավորել հաշվում` հրապարակման տեղում նշելով` Public, friends, only me և այլն։ Ավելի հին հրապարակումների տեսանելիությունը կարգավորելու համար պետք է անցնել սոցցանցի «Կարգավորումներ» բաժին, այնտեղից ընտրել «սահմանափակել հին հրապարակումների տեսանելիությունը» և վերջ։
Կարևոր է, որպեսզի ընկերների հետ էլ շփումները սահմանափակվի` կարգավորումներից կարելի է ընտրել, թե ով կարող է ձեր էջում հրապարակումներ կատարել։ Այս գործառույթի միջոցով դրանք չեն հայտնի ձեր հաշվում, մինչև թույլտվություն չստանան։
Եթե անգամ ունեք ամենահզոր, դժվար հիշվող ու ապահով գաղտնաբառը, այն պետք է 6 ամիսը մեկ թարմացնեք ու փոխարինեք նորով։
Ձանձրացնող ընկերների համար ևս գործառույթներ կան։ Կարելի է նրանց ավելացնել «սահմանափակ» խումբ, որից հետո տվյալ օգտատերը չի կարող տեսնել ձեր գրառումները։
Օգտատերերից գաղտնի տվյալներ ստանալու ամենատարածված տարբերակը թեստերն են։ Անցնելով տարատեսակ թեստեր` մեծանում է այն հավանականությունը, որ չարագործների մշակած հավելվածները կհայտվեն բրաուզերի և համակարգչի մեջ ու կսկսեն սքանավորել անհրաժեշտ տեղեկատվություն։ Դրանք որոշ դեպքերում նաև կարող են հասանելիություն ունենալ նամակագրություններին ու համակարգչում պահվող ֆայլերին։
Նման իրավիճակից խուսափելու համար միակ ելքը անտեսել թեստերն ու կասկած ներշնչող հավելվածները։ Պետք չէ պարզել, թե ով եք եղել նախորդ կյանքում կամ ինչպես են ձեզ կոչել Հուլիոս Կեսարի ժամանակ։
Եվ պարտադիր Facebook–ի հետ առնչություն ունեցող հավելվածները ներբեռնել App Store–ից և Google Play–ից։
Սյուզան Թոսունյան
