Ախուրյան և Մայիսյան գյուղերը համալրվել են համակարգչային կենտրոններով

Շիրակի մարզի Ախուրյան և Մայիսյան գյուղերում բացվել են գերարագ ինտերնետով հագեցած համակարգչային արդիական կենտրոններ, որոնք հիմնվել են «Orange Արմենիա»-ի և «Շեն» բարեգործական կազմակերության համատեղ ջանքերով: Այս մասին տեղեկացնում են «Օրանժ»-ի մամլո ծառայությունից:

Ախուրյանն այսօր ունի 10,050, իսկ Մայիսյանը` 2,100 բնակիչ: Երկու համակարգչային սրահներն էլ համալրված են  7  համակարգչով, տպիչով, Orange-ի Flybox երթուղիչով և հարմարավետ կահավորանքով, որոնք բնակիչներին հնարավորություն են տալու ոչ միայն կապի մեջ լինել աշխարհի հետ, այլ նաև մասնակցել համակարգչային դասընթացների: Նախագծի համար Orange-ն ընդհանուր առմամբ տրամադրել է 4,700,000 դրամ:

«Orange Արմենիա»-ի այս նախաձեռնությունն իրականացվել է հեռավոր և խոցելի համայնքների աջակցության և կայուն զարգացման ռազմավարական ծրագրի շրջանակներում, որի նպատակն է խթանել և աջակցել այդ համայնքների սոցիալ-տնտեսական զարգացմանը և վերջիններիս հնարավորություն տալ օգտվել բարձր տեխնոլոգիաների ընձեռած հնարավորություններից: