Google-ը Apple App Store-ում շատ կարճ ժամանակով տեղադրել է MyGlass հավելվածը և շատ արագ էլ ջնջել այն: Խոսքը այն հավելվածի մասին է, որը աշխատում է Google Glass խելացի ակնոցի հետ:
Միջադեպից կարճ ժամանակ անց ընկերության ներկայացուցիչները պատմել են սարքի նոր հնարավորությունների մասին, ինչպես նաև բացատրել, թե ինչու է այն ջնջվել հավելվածների խանութից: Պարզվում է, որ այն թարմացումը, որն անհրաժեշտ է հավելվածի բնականոն աշխատանքի համար, չի թողարկվել դեռ:
Շուտով օգտագործողները կկարողանան աչքը թարթելով լուսանկարներ անել: Ավելի վաղ ցանցում հայտնվեց Wink հավելվածը, որը թույլ էր տալիս անել դա:
«Մենք սկսել ենք լուսանկար անելուց, սակայն պատկերացրեք՝ ինչեր կարող ենք անել աչք թարթելով»,-Google-ի պաշտոնական բլոգում գրում են Glass-ի մշակողները: Նրանց խոսքով՝ շուտով հնարավոր կդառնա թարթելով վճարում անել կայանատեղիում, գնումներ անել ու նայել բաղադրատոմսեր:
Աղբյուրը՝ Mashable.com
