IBM-ը հայտարարել է Aspera ընկերության ձեռքբերման մասին, որը զբաղվում է ինտերնետով մեծ ծավալի ֆայլերի արագ փոխանցման տեխնոլոգիաներով: Գործարքի ֆինանսական մանրամասները չեն հաղորդվում:
Fasp անունով տեխնոլոգիան թույլ է տալիս կրճատել ֆայլերի փոխանցման ժամանակը 99,9%-ով: Սա նշանակում է, որ 24 Գբ ֆայլի փոխանցումն ինտերնետով, որի համար սովորական պայմաններում կպահանջվեր 26 ժամ, տեխնոլոգիայի շնորհիվ կկատարվի 30 վայրկյանում:
IBM-ի մամուլի հաղորդագրության մեջ, սակայն, տեխնոլոգիայի մանրամասները չեն նշվում: Նշենք, որ Aspera-ի ծառայություններից օգտվում են շատ խոշոր ընկերություններ, այդ թվում՝ Apple-ը՝iTunes Store օնլայն խանութի համար, ինչպես նաև Netflix ընկերությունը:
Fasp-ի շնորհիվ ֆիլմերի տեղադրումը iTunes-ում անհավատալիորեն կրճատվել է. նախկինում մեկ ֆիլմ տեղադրելու համար անհրաժեշտ էր միջինում 3.5 ժամ, իսկ այժմ` ընդամենը 5 րոպե:
Աղբյուրը՝ ibm.com
