Շատերը նկատած կլինեն Facebook սոցցանցում ընկերների կողմից նման գրառումներ՝ “Hey there! my Truth key is 34641. You can tell me something that you can’t say to my face.”: Եթե գոնե մեկ անգամ սեղմել եք այս գրառմամբ հղման վրա, ապա միանշանակ ծանոթ եք truthly.me «գաղտնի» սոցցանցին:
Truthly.me-ն ստեղծվել է հայ նախագծողներ Հրաչյա Մանուկյանի և Ալեքսանդր Ադամյան կողմից: Այն սոցցանց է, որը հնարավորություն է տալիս անանուն հայտնել կարծիքներ՝ ուղղված ծանոթներին կամ ընկերներին: Այլ կերպ ասած՝ գրել և ասել այն, ինչը չեք կարողանում ասել ուղիղ՝ սիրո խոստովանություններից մինչև բացասական կարծիքներ:
itTREND.am-ի հետ զրույցում Truthly-ի հեղինակ Հրաչյա Մանուկյանը կիսվեց սոցցանցի գաղափարի, նպատակների և առաջիկայում սպասվող նորությունների մասին:
Ե՞րբ և ինչպե՞ս է ստեղծվել truthly.me-ն
Truthly.me-ի շուրջ սկսվեցինք աշխատել 2013թ-ի հունվարին, իսկ կայքի առաջին բեթա տարբերակը հասանելի դարձավ 2013-ի օգոստոսին: Միտքը ծնվել էր 2012-ին, երբ ընկերներիցս մեկին ցանկանում էի հայտնել մի բան, որը ուղիղ ասելու դեպքում, միգուցե սխալ հասկացվեր: Հենց այդ ժամանակ հասկացա, որ շատ լավ կլիներ, եթե կարողանայի կարծիքս հայտնել անանուն: Գաղափարովս կիսվեցի ուսանողական տարիների ընկերոջս՝ Ալիկի հետ, ով այդ պահին ուներ բիզնեսի և ՏՏ ոլորտում պրոֆեսիոնալ գիտելիքներ: Միտքը նրան նույնպես դուր եկավ և միասին սկսեցինք լուծումներ փնտրել:
Truthly.me-ն նախագծելիս, երկու կարևոր սկզբունք ենք հաշվի առել: Նախ ապահովել, որ անանուն կարծիքներ կարողանան հայտնել միայն իրար ծանոթ մարդիկ և երկրորդ՝ մարդիկ չվախենան «բռնվելուց», այլ կերպ ասած՝ ապահովել անանունության գաղտնիություն:
Որքա՞ն օգտագործող ունի ներկա պահին սոցցանցը
Այս պահին Truthly.me-ում գրանցված է մոտ 5000 մարդ: Իրականում այդ թիվը կարող է շատ ավելի մեծ լինել, եթե մի փոքր նախագծի մարքեթինգով զբաղվենք, քանի որ մեծ պոտենցիալ կա: Օրինակ՝ Ռուսաստանից 3 օրում կայքում գրանցվեց 2000 մարդ՝ առանց մեր կողմից որևէ միջամտության: Պարզապես Facebook-ում օգտագործողները տարածում էին իրենց «բանալի համարը» և ընկերները գրանցվում էին:
Ըստ ակտիվ օգտագործողների աշխարհագրության՝ վիճակագրությունն այսպես է՝ Ռուսաստան, Հայաստան, ԱՄՆ, Ուկրաինա, Գերմանիա, Իսրայել, Վրաստան, և այլն:
Truthly.me օգտագործողներն օրական որքա՞ն հաղորդագրություններ են իրար ուղարկում
Օրական հաղորդագրությունների հստակ թիվ չենք կարող նշել, սակայն կարող ենք ասել՝ մի քանի տասնյակ:
Եթե չեմ սխալվում արդեն մեկ անգամ ինտերֆեյսի ռեդիզայն եք արել, նոր փոփոխություններ սպասվու՞մ են
Փոփոխություններ շատ են լինելու (թե՛ արտաքին և թե՛ ֆունկցիաների համալրման), սա ընդամենը բեթա տարբերակ է: Անընդհատ նոր բաներ ենք մտածում և փորձարկում: Օրինակ այս պահին գրեթե պատրաստ է ընկերների ինչ-որ հատկանիշները կամ գործողությունները գնահատելու նոր ֆունկցիան: Ձեր էջում ժամանակ առ ժամանակ կհայտնվեն տարբեր հարցեր: Օրինակ՝ «Քեզ դո՞ւր են գալիս Ալինայի ֆեյսբուքյան գրառումները» կամ «Քո կարծիքով Ալինան պատասխանատո՞ւ մարդ է»: Պետք է պատասխանել «Այո» կամ «Ոչ»: Իսկ վերջում Ալինային հաղորդագրություն կգնա այն մասին, որ իր ընկերների 73%-ը կարծում են, որ նա պատասխանատու մարդ է կամ իր ընկերները 90%-ին դուր չեն գալիս նրա ֆեյսբուքյան գրառումները: Կարծում ենք, սա հնարավորություն կտա մարդկանց ինքնակատարելագործվել:
Ե՞րբ է սպասվում Truthly.me-ի բջջային Android կամ iOS հավելված
Բջջային հավելված ունենալն առաջնային խնդիր է այս պահին: Truthly-ն որպես բջջային հավելված, կարծում ենք, մի քանի տասնյակ անգամ ավելի ակտիվ կլինի վեբ տարբերակից, քանի որ սմարթֆոնում կա ծանուցումներն օպերատիվ ստանալու մեխանիզմ և ի վերջո սմարթֆոնը միշտ «ձեռքի տակ է»: Կարծում եմ այս տարվա ընթացքում մենք կգործարկենք Truthly.me-ի թե՛ Android և թե՛ iOS տարբերակները
Ինչպիսի՞ն է Truthly.me-ի բիզնես մոդելը
Իրականում Truthly-ն գործիք է ոչ միայն անհատների, այլ նաև բիզնեսների համար: Վերջիններիս համար այն կլինի վճարովի: Այսինքն, հասանելի կլինեն բիզնես account-ներ, որոնք լրացուցիչ ֆուկցիաներով հարմարեցված կլինեն բիզնեսներին: Truthly-ն հնարավորություն կտա ընկերությունների մենեջմենթին անանուն կարծիքների և հարցումների միջոցով իմանալ, թե ինչ է կատարվում ընկերության ներսում: Նաև կգործի աշխատողների մասնագիտական ունակությունները գնահատելու մեխանիզմ:
Այս մասին երկար չեմ ուզում պատմել, քանի որ ներկա պահին մենք հանդիպում ենք ընկերությունների տնօրենների և HR ներկայացուցիչների հետ և փորձում ենք հասկանալ, թե որքանո՞վ է ճիշտ ընտրված այս բիզնես մոդելը: Միայն զրույցներից հետո պարզա կդառնա Truthly-ի B2B մոդելը:
Դե իսկ մոնետիզացիան անհատների համար լինելու է լրացուցիչ՝ պրեմիում ֆունկցիաների տեսքով: