Կրելի գաջեթներն օրեցօր գրավում են շուկան, իսկ ներկայացվող նորույթներն աստիճանաբար համալրվում են նոր հնարավորություններով։ CES 2015 ցուցահանդեսին ներկայացվել են բազմաթիվ կրելի սարքեր, որոնցից լավագույններին առաջարկում ենք ծանոթանալ ստորև։
Sony SmartWatch 3
Իր դիզայնով աչքի ընկնող այս մոդելն ունի 1,6 դյույմանոց էկրան՝ 320 х 320 թույլատրությամբ, քառամիջուկ պրոցեսոր, 512 ՄԲ օպերատիվ հիշողություն և 4 ԳԲ ներքին։ Մարտկոցը 420 մԱ/ժ է և բավարարում է 2 օր։
Alcatel OneTouch Watch
Այս մոդելն ունի կլոր էկրան և շատ նման է Moto 360 մոդելին։ Առավելություններից է մարտկոցը, որի լիցքը բավարարում է 5 օր։ Թերություններից է Android Wear ՕՀ-ի բացակայությունն ու հնացած STM 32F429 պրոցեսորի օգտագործումը, որի հաճախականությունը 180 ՄՀց է։
Withings Activite Pop
Արտաքինից Activite Pop-ը հիշեցնում է սովորական ժամացույց, սակայն այն կարողանում է ինֆորմացիա հավաքել օգտագործողի քայլերի, վազքի, նույնիսկ լողի և քնի փուլերի մասին։ Արդյունքները կարելի է տեսնել հատուկ հավելվածում։
Lenovo Vibe Band VB10
Lenovo-ի ինժեներները, իմանալով, որ կրելի սարքերի մեծ մասի թերությունը անտարողունակ մարտկոցն է, ստեղծել են այնպիսի մոդել, որն օգտագործում է էլեկտրոնային թանաքով աշխատող Vibe Band VB10 էկրան։ Դրա շնորհիվ սարքը մեկ լիցքավորումով աշխատում է մոտ մեկ շաբաթ։ Սարքը ցուցադրում է ժամանակն ու ամսաթիվը, SMS-հաղորդագրությունները, ծանուցումները, անցած քայլերի ու այրված կալորիաների քանակը։
Sony SmartBand Talk
Եթե դուք մինիմալիզմի երկրպագու եք, ապա SmartBand Talk-ը ստեղծվել է հենց ձեր համար։ Այս ֆիտնես-թրեքերն աշխատում է էլեկտրոնային թանաքով, անջրանցիկ է և կարողանում է ճանաչել ձայնային հրահանգները։