ԻՏՁՄ․ «Էլեկտրոնային Հայաստան» համաժողովը կազմակերպվեց առանց Հայաստանի ՏՏ ոլորտի

Սեպտեմբերի 29-ին Հայաստանում Եվրոպական միության պատվիրակությունը, Հայկական բարեգործական ընդհանուր միության (ՀԲԸՄ), Թումո ստեղծարար տեխնոլոգիաների կենտրոնի և Հայաստանում Էստոնիայի դեսպանության հետ համագործակցությամբ կազմակերպել էր «Էլեկտրոնային Հայաստան» համաժողովը, որին ներկա չեն եղել հայաստանյան ՏՏ ոլորտի ներկայացուցիչներ։ Այս կապակցությամբ Ինֆորմացիոն տեխնոլոգիաների ձեռնարկությունների միությունը հայտարարություն է արել՝ հրավիրելով ՀՀ Նախագահի և ՀՀ վարչապետի ուշադրությունը նշված խնդրին։

«Հայաստանի էլեկտրոնային կառավարման ոլորտում վերջին տարիների զարգացումները բնութագրվում են օտարերկրյա ձեռնարկությունների մասնակցային գերակայությամբ, չնայած Հայաստանի զարգացումը պահանջում է հակառակը:

Հայկական ՏՏ ընկերություններում ձևավորված է հզոր փորձ և գիտելիք՝ արտերկրում և Հայաստանում իրականացված բազմաթիվ ծրագրերի արդունքում, որը լրջագույն ներուժ է ինչպես երկրի թվային, այնպես էլ տնտեսական զարգացման, արտահանման մեծացման, որակյալ աշխատատեղերի ստեղծման առումով։

Սույն թվականի սեպտեմբերի 29-ին Հայաստանում Եվրոմիության գրասենյակի և ՀՀ կառավարության աշխատակազմի նախաձեռնությամբ և աշխատակազմի ղեկավար-նախարար Դավիթ Հարությունյանի մասնակցությամբ տեղի ունեցած «Էլեկտրոնային Հայաստան» համաժողովին բացակայում էր Հայաստանի ՏՏ ոլորտը:

Մենք երևույթը դիտարկում ենք որպես Հայաստանի կառավարության կողմից՝ ՏՏ ոլորտը էլեկտրոնային կառավարման գործընթացներից մեկուսացնելու քաղաքականություն, այն գնահատում ենք անխոհեմ և ապազգային։

Այս հիվանադագին քաղաքականությունը նոր չէ, սակայն մենք այլևս անտարբեր չենք լինելու, քանի որ կարծում են, որ հիմնախնդրի պատճառ է նաև մեր հանդուրժողականությունը: Այս քաղաքականության հետեւանքով կոպտագույն սխալներ են արվել և արվում Հայաստանի թվային զարգացման ծրագրերում, որի արդյունքում մսխվում են հսկայական միջոցներ, որոնց մեծ մասը վարկային միջոցների հաշվին՝ մեծացնելով երկրի արտաքին պարտքը։

Պահանջում ենք

  • նախաձեռնել հետաքննություն, որպեսզի պատժվեն այն պաշտոնյաները, որոնց ուղղակի ղեկավարությամբ և մասնակցությամբ ձախողվել են ծրագրեր և մսխվել են մեր՝ հարկատուներիս գումարները, մեր՝ քաղաքացիներիս վրա փաստացի դրված վարկերը,
  • իրականացնել դեռևս 2 տարի առաջ ԻՏՁՄ-ի կողմից ներկայացված առաջարկությունները՝ Հայաստանի պետական գնումների համակարգի բարելավման վերաբերյալ,
  • ստեղծել մրցակցային միջավայր՝ Հայաստանի թվային շուկայի զարգացմանը հայկական տեխնոլոգիական ընկերությունների մասնակցության համար։

Հրավիրում ենք ՀՀ Նախագահի և ՀՀ վարչապետի ուշադրությունը նշված խնդրին, և հայտնում մեր պատրաստակամությունը՝ համակողմանի աջակցել իրավիճակի շտկման գործողություններին՝ հանուն մեր պետական և ազգային շահի»: