Վեբ դիզայնի ամառային դպրոց ծրագիր՝ 13-17 տարեկան դպրոցականների համար

Վեբ դիզայնի ամառային դպրոց ծրագիր՝ 13-17 տարեկան դպրոցականների համար

Հայ-հնդկական ՏՀՏ գերազանցության կենտրոնը և Ձեռնարկությունների ինկուբատոր հիմնադրամը հունիսի 6-հուլիսի 11-ը կազմակերպում են Վեբ դիզայնի ամառային դպրոցի ծրագիր 13-17 տարեկանների համար:

Ծրագրի ընթացքում կստեղծվեն 3-5 մասնակիցներից բաղկացած խմբեր, ովքեր մենթորի օժանդակությամբ կաշխատեն իրենց սեփական վեբկայք գաղափարի մշակման վրա (օր.՝ օնլայն կինոթատրոն, գրադարան և այլն): 5 շաբաթվա ընթացքում աշխատանքներ կտարվեն գաղափարի զարգացման, կայքի բովանդակության, կառուցվածքի և դիզայնի վրա, ինչպես նաև կներկայացվի բազային մարքեթինգը: Վերջին և առանցքային քայլը կլինի HTML և CSS գործիքների միջոցով մրցունակ վեբկայքի կոդավորումը և կառուցումը:

Այս ընթացքում մասնակիցներին կտրվի անհրաժեշտ տեղեկատվություն և ուղղություն՝ մերօրյա շուկայի պահանջներին համապատասխան վեբկայք մշակելու համար: Թիմային աշխատանքը խթանելու նպատակով կկազմակերպվեն ժամանցային ծրագրեր` կինոդիտման և խաղերի տեսքով:

13225171_1156316627747107_1651766621_o

Թիմերի վերջնական արդյունքները կներկայացվեն Հայ-հնդկական ՏՀՏ գերազանցության կենտրոնի կոնֆերանսների դահլիճում` Power Point Presentation-ի միջոցով: Ծնողները և հետաքրքրված անձինք կարող են ներկա գտնվել վեբկայքի վերջնական ներկայացմանը:

Ներկայացման օրը մասնակիցները կստանան վկայականներ և վեբ ծրագրավորմանն առնչվող գրքեր:

Ամառային դպրոցի հիմնական թեմաներն են Web ծրագրավորում, գրաֆիկա և դիզայն, կարողությունների զարգացում, փորձի փոխանակման սեմինարներ, ժամանց:

Առավել մանրամասներին ծանոթանալու համար կարող եք այցելել այստեղ: Հայ-հնդկական ՏՀՏ գերազանցության կենտրոնը ՀՀ կառավարության և Հնդկաստանի կառավարության համատեղ ծրագիրն է, որը իրականացվում է Ձեռնարկությունների ինկուբատոր հիմնադրամի (Հայաստան) և C-DAC կենտրոնի (Հնդկաստան) կողմից: Կենտրոնը գործում է 2011թ նոյեմբերից: Այն տեղակայված է Երևանի պետական համալսարանում և կազմակերպում է ՏՀՏ ոլորտի կարճաժամկետ և երկարաժամկետ նեղ մասնագիտական դասընթացներ, իրականացնում է գիտահետազոտական աշխատանքներ, հավաստագրում և խորհրդատվություն տարբեր թեմաներով: Արդեն երկրորդ տարին է, կենտրոնը կազմակերպում է նաև Ամառային դպրոց ՝ աշակերտների համար: