«Համակարգերի տեսության» (կիբեռնետիկա) ապագա մասնագետները պատրաստ են նորարական ուսումնական տարվան

«Համակարգերի տեսության» (կիբեռնետիկա) ապագա մասնագետները պատրաստ են նորարական ուսումնական տարվան

Սեպտեմբերի 1-ին տեղի է ունեցել «Համակարգերի տեսություն» (կիբեռնետիկա) կրթական նոր ծրագրի բացման հանդիսավոր արարողությունը: Միջոցառմանը մասնակցել են ՀՀ կրթության և գիտության նախարարի խորհրդական Արտակ Աղաբալյանը, «Ինսթիգեյթ» ընկերության տնօրեն Վահագն Պողոսյանը, Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Ալեքսանդր Եսայանը, փոխտնօրեն Հայկ Չոբանյանը և այլ կազմակերպությունների ներկայացուցիչներ ու հյուրեր: Կազմակերպիչները շնորհավորել են աշակերտներին գիտելիքի օրվա, ինչպես նաև արդիական մասնագիտություն ընտրելու առթիվ և մաղթել կանաչ ճանապարհ:

Կրթական ծրագրին մասնակցում են 18 աշակերտ: Վերջիններս ուսումնական տարին կսկսեն ճանաչողական 5-օրյա արշավով: Կազմակերպիչները նշել են, որ այս ճանապարհորդությունը հնարավորություն կտա աշակերտներին ընկերանալ և միաժամանակ ծանոթանալ հայկական բնաշխարհին:

Հարկ է նշել, որ ուսման տևողությունը չորս տարի է։ Առաջին տարին ներառում է հանրակրթական ավագ դպրոցի 10-12-րդ դասարանների ուսումնական ծրագիրը։ Հաջորդ երեք տարիներին ուսանողները կստանան մասնագիտական կրթություն` «Համակարգերի տեսություն» մասնագիտության ծրագրին համապատասխան։ Առաջին տարվա ուսուցումը անցկացվում է Երևանի ինֆորմատիկայի պետական քոլեջում:

4-ամյա ծրագրի ավարտին ուսանողները կստանան ՀՀ հանրակրթության միջնակարգ ընդհանուր կրթության վկայական և «Համակարգերի տեսություն» մասնագիտական որակակավորում։

Հիշեցնենք, որ կրթական ծրագիրն իրականացվում է ԻՏՁՄ-ի և «Ինստիգեյթ ուսումնական կենտրոն» հիմնադրամի կողմից՝ ՀՀ Կրթության և գիտության նախարարության թույլտվությամբ (N837 Ա/2):