Վենչուրներ ներգրավելու գաղտնիքներ Նիցան Յուդանից

Օրերս Երևանում էր Benivo (նախկին՝ FlatClub) ընկերության հիմնադիր և տնօրեն Նիցան Յուդանը: Benivo-ն հարթակ է, որն ընկերություններին տրամադրում է աջակցություն իրենց աշխատակիցների տեղափոխման ու վերաբնակման հարցերում, որի ծառայություններից օգտվում են Google-ը, Microsoft-ը, Bloomberg-ը, Vodafone-ը, Apple-ը:

Վերջերս այն ստացել է $ 10 մլն վենչուր PBJ Capital ամերիկայան հիմնադրամից Հայաստանում գործունեության խորացման և ընդլայնվելու համար: Ընկերությունը նախկինում վենչուրներ է ստացել Granatus Ventures, Millhouse, Altair վենչուրային հիմնադրամներից:

2015-ի հունիսից Benivo-ն բացեց իր մասանճյուղը Երևանում: Այժմ այն ունի 70 աշխատակից Երևանում և Լոնդոնում: itTrend-ը զրուցել է Նիցան Յուդանի հետ ներդրումներ ներգրավելու գաղտնիքների, կարևոր նախապայմանների ու Հայաստանում ՏՏ ոլորտի մասին:

Ներկայացրեք, ներդրումներ գրավելու հաջող շրջանի  բանալիները: Ինչպե՞ս հասնել ներդրողներին: Արդեն մեծ փորձ ունեք, ընտ Ձեզ, ինչի՞ն է ամենաշատը հարկավոր ուշադրություն դարձնել:

-Առաջին հերթին հարկավոր է ժամանակ տրամադրել, ամեն  ներդրումային շրջան տևում է նվազագույնը 5-6 ամիս: Հարկավոր է հանդիպել բազմաթիվ ներդրողների: Ներդրողը տարեկան միջինում ստանում է 1200 գործարքի հնարավորություն, բայց արդյունքում 5-10 ներդրում է իրականացնում: Հարկավոր է միայն մեկի հետ հույսեր չկապել ու կախվածություն ունենալ հենց այդ մեկից:

Ամենակարևոր բանալիներն են՝ մտածել ինչպես ներդրողը, դիմել միաժամանակ շատերին և բարեկամական, ընկերական հարաբերություններ կառուցել նրանց հետ:

Նրանք ի վերջո մարդիկ են և գումար են ներդնում հենց մարդկանց մեջ: Խորհուրդներ հարցրեք նրանցից, նախքան գումար խնդրելը: Եվ ցույց տվեք առաջընթաց:  Պետք է մտածել ինչպես ներդրողը: Պատկերացրեք ձեզ իր տեղում և մտածեք, ինչպես դուք կվարվեիք և այդպիսով գտեք ներկայանալու ճիշտ ձևը:

Շատ հաճախ սթարթափների մոտ չի ստացվում, ոչ թե որ գաղափարը հրաշալի չէ, այլ սխալ մոտեցում ու ուղի են ընտրում ներդրումներ ներգրավելու համար:

Երկրորդ քայլը՝ բիզնեսը պատրաստել ներդրումներին, կազմել բիզնես հստակ պլան, ցույց տալ ինչպե՞ս ես օգտագործելու ներդրումը հաջորդ 15-20 ամիսների ընթացքում և ինչ արդյունքի համար ներդրողը պետք է գումար տրամադրի: Որն է հենց քո առավելությունը, ինչու հենց քո թիմը: Ներդրողը եթե համոզվի որ դու շուկայում կունենաս քո տեղը, ապա կհաջողես:

44c68fc1-18e0-4dfa-af32-bdb09c320759-large

Հայաստանում 2015-ից գործում է Benivo-ն (FlatClub): Վստահ եմ` ուսումնասիրել եք Հայաստանի ՏՏ ոլորտը, ինչպե՞ս կգնահատեք այն, ի՞նչ բացեր եք Դուք տեսնում ոլորտում:

Ես ծագումով Իսրայելից եմ և բազմաթիվ  զուգահեռներ եմ տանում Հայաստանի ու Իսրայելի միջև: Երկուսն էլ փոքր երկրներ են, ունեն մեկ կրոն, շրջապատված են այլ կրոն դավանող և ոչ բարյացկամ հարևաններով, ունեն մեծ սփյուռք, նաև խորհրդային շրջանից կարծրացած կրթությունը, շատ են նմանությունները: 90-ականներից հետո, հետխորհրդային շրջանում փոփոխությունները մեծ ու ակնհայտ են:

Երբ մենք առաջին անգամ 2 տարի առաջ եկանք այստեղ, համատեղ  աշխատանքային միջավայր էինք փնտրում: Ընտրությունն այնքան էլ մեծ չէր: Հիմա փոխվել է, դա կապված է նաև սթարթափերի ավելացմամբ:

Այդ իրավիճակը ինձ հիշեցնում էր Մեծ Բրիտանիայում  7 տարի առաջվա պատկերը: Այնտեղ սթարթափերի համար չկային շատ հնարավորություններ, որը փոխվեց կառավարության հարկային օրենսդրական բարեփոխումներից հետո: Դրանց թիվն էապես ավելացել է:

Այստեղ տեսնում եմ և՛ հետաքրքրություն, ոլորտի հանդեպ ուշադրություն, և՛ տաղանդներ, և՛ ձևավորված մշակույթ:

Բայց սթարթափերում հրեշտակ ներդրողների պակաս կա, այստեղ չեն ցանկանում անհատները ռիսկի դիմել այս ոլորտում, չգիտեմ ինչու: Մյուս կողմից էլ համեմատաբար քիչ են հաջողության պատմությունները, հաջողակ ընկերությունների հետ աշխատանքի փորձառությունը, ներգրավվածությունը: Սթարթափների փորձի փոխանակումը, կապերն ու հարաբերությունները կարևոր է սթարթափ էկո-համակարգի զարգացման համար:

Ի՞նչ  խորհուրդ կտաք հայկական սթարթափերներին, զարգացման ու հաջողության համար: Ո՞րն է հաջողության ձեր բանաձևը:

Ամենակարևորը ուշադրություն դարձնեն հաճախորդներին: Ներկայացնում են հրաշալի գաղափարներ, ինովացիոն լուծումներ, բայց ամենակարևորը օգտատերերն են, հաճախորդները: ի վերջո, նրանք են վավերացնում քո կոնցեպցիայի աշխատունակությունը: Հեշտ է ասել, որ «հրաշալի գաղափար է», բայց գումար ներդնելը այլ է, հավատալը այլ է:

Բիզնեսում պետք է առաջնորդվել 3  S-երի սկզբունքով՝ «sell, solve, scale»:

Սկսում ենք վաճառելով, օգտվողները իրենք են հուշում ինչ խնդիրներ, անհրաժեշտություններ կան: Լուծում ենք դրանք, որից հետո արդեն ընդլայնվում: Մենք առաջնորդվում ենք այս սկզբունքով:

Նունե Գրիգորյան