Apple-ի երկրորդ կամպուսի կառուցումը սկսվել է 2014թ.: Այն գտնվում է Կուպերտինոյում և զբաղեցնում է 0,7 կմ քառ. տարածք, որի վրա կառուցվելու է օղակի տեսք ունեցող, 260 հազ. խորանարդ մետր հրապարակով շինություն: Շենքի ճարտարապետական նախագծի հեղինակը Foster + Partners ընկերությունն է:
Ընկերությունը հայտարարել է, որ կամպուսի պաշտոնական բացումը կլինի այս տարվա ապրիլին: Այն կանվանվի Apple Park: Սա Սթիվ Ջոբսի նախաձեռնած վերջին ամենամեծ նախագիծն է, նրա պատվին ընկերության ներկայացումների դահլիճը կանվանվի վերջինիս անունով:
Ներկայացնում ենք 10 հետաքրքիր փաստ այս հսկայական շինությունից:
- Շինության նախագիծը մասամբ ոգեշնչված է Լոնդոնի հրապարակի նախագծով, որտեղ տները շրջապատում են այգին և մասամբ էլ Սթենֆորդ համալսարանի կամպուսից
- Օղակաձև ապակեպատ հիմնական շինությունում կտեղակայվի մոտ 13 000 աշխատակից
- Պատերը կառուցված են աշխարհի ամենամեծ կոր ապակե ավելի քան 3000 կտորներից
- Այն կունենա ստորգետնյա լսարան, որում կտեղավորվի 1000 մարդ
- Կամպուսի 80%-ը ծածկված է լինելու կանաչ տարածություններով, նախատեսվում է տնկել մոտ 7000 ծառ
- Կառույցն ամբողջությամբ օգտագործելու է էներգիայի վերամշակվող աղբյուրներ
- Թափոններից վերամշակված ավելի քան 157.000 լիտր ջուր օրական կօգտագործվի կանաչապատման, շինության հովացման, կոյուղու և այլ կարիքների համար
- Կգործի 70 միլիոն դոլար արժողությամբ առողջապահական կենտրոն, որտեղ միաժամանակ հնարավոր կլինի սպասարկել ընկերության մոտ 20 000 աշխատակցի
- Կամպուսի տարածքում կգործի բնական օդափոխության համակարգ, որի շնորհիվ տարվա 75%-ը հիմնական շենքը զերծ կմնա օդորակիչների աշխատանքից ու ջեռուցումից
- Ամբողջ նախագիծը ընկերության համար կարժենա մոտ 5 միլիարդ դոլար, որի մասին իր հարցազրույցներից մեկում նշել է Թիմ Քուքը