«Կասպերսկի Լաբորատորիա»-ն և «ՀայՏեք» կենտրոնը Երևանում կիբեռանվտանգության սեմինար են անցկացրել ուսանողների համար

«Կասպերսկի Լաբորատորիա»-ն և «ՀայՏեք» կենտրոնը Երևանում կիբեռանվտանգության սեմինար են անցկացրել ուսանողների համար

Համակարգչային անվտանգության  ոլորտի միջազգային առաջատար «Կասպերսկի Լաբորատորիա» ընկերությունը և «ՀայՏեք» կիբեռանվտանգության կենտրոնը հունիսի 8-ին Երևանում անցկացրել են կիբեռանվտանգության սեմինար ուսանողների և դասախոսների համար։

Սեմինարին մասնակցել են տեղեկատվական տեխնոլոգիաների և տեղեկատվական անվտանգության մասնագիտությունների կրթական ծրագրեր իրականացնող ՀՀ առաջատար բուհերի ուսանողներն ու դասախոսները։

 

Միջոցառման բացումը կատարել է Հայաստանում և Վրաստանում «Կասպերսկի Լաբորատորիա»-ի տարածքային ներկայացուցիչ  Արմեն Կարապետյանը։ Ընկերության հակավիրուսային ավագ փորձագետ Սերգեյ Լոժկինը ներկայացրել է «Գլոբալ սպառնալիքները կիբեռտարածքում», իսկ նախավաճառքային աջակցության ճարտարագետ Իվան Չուվիլինը՝ «Խոշոր բիզնեսի կիբեռանվտանգությունը» թեմաները։  Իվան Չուվիլինը նաև անցկացրել է «Ինտերակտիվ կիբեռնմանակում» խորագրով խաղ, որի ընթացքում սեմինարի մասնակիցներն արդիական հմտություններ են ձեռք բերել իրական կիբեռհարձակմանը նմանակող պայմաններում անվտանգության խնդիրներ լուծելով։ Խաղի հաղթող թիմն ստացել է մրցանակ։

««Կասպերսկի Լաբորատորիա»-ն բազմաթիվ երկրներում մեծ ջանքեր է գործադրում ուսանողների շրջանում կիբեռանվտանգության ոլորտի հմտությունները զարգացնելու ուղղությամբ։ Հայաստանում այդ ծրագրերը կենտրոնացած են Հայ-Ռուսական և Հայաստանի ազգային պոլիտեխնիկական համալսարաններում։ Սակայն անհրաժեշտություն կար, որ «Կասպերսկի Լաբորատորիա»-ի կիբեռանվտանգության արդիական տեխնոլոգիաները և գործիքները ներկայացվեն ուսանողների ավելի լայն շրջանակի, որպեսզի նրանք աշխատանքի անցնելուց կարողանան լիարժեք բավարարել ավելի մեծ թվով ձեռնարկությունների պահանջարկը կիբեռանվտանգության ոլորտում։ Համոզված եմ, որ անցկացված սեմինարը ծառայեց իր այս կարևոր նպատակին»,- նշում է Հայաստանում և Վրաստանում «Կասպերսկի Լաբորատորիա»-ի տարածքային ներկայացուցիչ Արմեն Կարապետյանը։

Սեմինարի մասնակիցներն ունեցել են կիբեռանվտանգության վերաբերյալ իրենց հետաքրքրող բոլոր հարցերը քննարկելու և պարզաբանելու հնարավորություն։