Հայաստանում տաղանդի ներհոսք է նկատվում.նախարար

 ՀՀ բարձր տեխնոլոգիական արդյունաբերության նախարար Հակոբ Արշակյանը Հայաստանում տաղանդի ներհոսք է նկատում: Նախարարի հավաստմամբ, 2019թ-ին տեխնոլոգիական ոլորտի սկսնակ ընկերությունների համար տրվող արտոնություններով սփյուռքահայերի կողմից բացվել են շուրջ 45 ընկերություններ : Արշակյանն այս մասին հայտնել է իր տարվա ամփոփիչ ասուլիսում:

«Այս տարի տեխնոլոգիական ոլորտի շուրջ 230 նորաստեղծ ընկերություններ դիմել են հարկային արտոնություններ ստանալու համար: Ընդհանուր առմամբ, իրենց ներկայացրած թվերով շուրջ 1200 նոր աշխատատեղ են ստեղծել: Մենք ունենք սփյուռքից դիմած անհատների և ընկերությունների մեծ թիվ՝ դիմածների շուրջ 15-20 տոկոսը: Շուրջ 45 ընկերություն բացվել է սփյուռքահայերի կողմից: Սա նշանակում է, որ տաղանդի ներհոսք ունենք»,-նշել է նախարարը՝ դա համարելով շատ լավ նորություն:

Հարկային արտոնություն ստանալու ծրագրով դիմել են Ֆրանսիայից, ԱՄՆ-ից, Ռուսաստանից, Հոլանդիայից, Ավրստալիայից, Վրաստանից, Շվեյցարիայից, Իրանից, Գերմանիայից, Նիդերլանդներից, Միացյալ Թագավորությունից: Դիմող ընկերությունները գործունեություն են ծավալում տարբեր ուղղություններով՝ ծրագրային ապահովման, էլեկտրոնիկայի, միկրոէլեկտրոնիկայի, արհեստական բանականության և այլն:

ՏՏ ոլորտի պետական աջակցության մասին ՀՀ օրենքն ուժի մեջ է մտել 2015 թ., որի արդյունքում ՏՏ ոլորտում նոր ստեղծվող տնտեսավարող սուբյեկտներին տրամադրվում են հարկային արտոնություններ: 2019-ի ապրիլին ԱԺ-ն ընդունել է օրենք, որով  նորաստեղծ ընկերությունների համար հնարավորություն է ստեղծվում հարկային արտոնություններից օգտվելու ժամկետը երկարացնել մինչ 2022թ. դեկտեմբերի 31-ը ներառյալ: