Հայկական արտադրության Բիոսկոպը կկարողանա կանխել մահացու հիվանդությունների առաջացումը

Մեր օրերում, երբ գիտությունն ու տեխնիկան զարգանում են աննախադեպ արագընթաց քայլերով, դեռևս կան անբուժելի համարվող հիվանդություններ, որոնց գոյության փաստն ակնհայտ է, իսկ պատճառներն ու վաղ փուլում հայտնաբերելու հնարավորությունը` անհայտ:

Բիոսկոպ. սա սարք է, որի հայտնագործումը թույլ է տալիս հեռահար կերպով գնահատել կենսաբանական համակարգի վիճակը, կանխորոշել տարբեր հիվանդությունների սկիզբը, և, հետևաբար, բուժել դրանք առաջացման սկզբնական փուլում:

ԳԱԱ Ֆիզիոլոգիայի ինստիտուտի գիտնական Ռաֆիկ Սարգսյանի այս հայտնագործությունը հիմք դարձավ, որպեսզի 2010 թվականին նա հիմնադրի «ԲԻՈԱՐՏ» ընկերությունը, որի գործունեությունը կապված է գիտական սարքավորումների, համակարգչային ծրագրային փաթեթների մշակման և նոր կենսա-բժշկական սարքավորումների արտադրության հետ: Ընկերության մասնագետներից (կենսաբաններ, ֆիզիկներ և ծրագրավորողներ) երկար ժամանակ պահանջվեց Բիոսկոպը ներկայիս կիրառելի չափերին հասցնելու և դրա համար համապատսխան ծրագրային լուծում ապահովելու համար:

Սարքի մի մասը կարելի է ամրացնել մարմնի որոշակի հատվածի և կրել անգամ քնած ժամանակ: Օրգանիզիմից եկող ինֆորմացիան հավաքագրվում է փոքրիկ սարքում, որը հնարավոր է պահել անգամ գրպանում ու 24-ժամյա գրանցում կատարել: Այնուհետև ստացված ինֆորմացիան մուտքագրվում է համակարգիչ և համապատասխան ծրագիրն արդեն կատարում է իր վերլուծությունը:

Սարքի արդյունավետությունը ստուգելու համար առաջին փորձերն արվել են կենդանիների վրա: Մկներին վարակել են ուռուցքով և սարքի միջոցով գրանցել նրանց օրգանիզմից եկող ազդակները: Արդեն 3-րդ օրը կենդանիների մի մասի մոտ պիրկ է առաջացել: Փորձի արդյունքում պարզվել է, որ կենդանիներից որոշներն առողջացելեն և սատկել են միայն նրանք, որոնց մոտ առաջացել էր պիրկը: Սա փաստում է, որ անգամ հիվանդության 3-րդ օրը, որը շատ վաղ շրջան է ախտորոշման համար, կարելի է պարզել կենդանին կսատկի, թե կվերականգնվի:

Նմանատիպ մի փորձ կատարվել է նաև հավի ձվերի ինկուբացիայի հետ կապված: Բիոսկոպի միջոցով արդեն 7-8 -րդ օրը հնարավոր է եղել պարզել, թե 21-րդ օրը դրված ձվերից քանիսից ճուտ դուրս կգա: Փաստորեն, սարքը հնարավորություն է տալիս շատ վաղ պարզել, թե ձվերից քանիսն են անիմաստ պահվում և ժամանակին փոխարինել դրանք: Ստացվում է, որ այն, բացի բժշկականից, ունի նաև կիրառական նշանակություն:

Բիոսկոպի առանձնահատկությունն այն է, որ այն կարողանում է գրանցել կենսաբանական համակարգերի շուրջ առկա դաշտի փոփոխությունը: Ինչպես պնդում են ընկերության մասնագետները` բոլոր փորձերի պարագայում էլ սկզբում փոխվում է կենսաբանական համակարգի շուրջ ստեղծված դաշտը և հետո միայն առաջանում հիվանդությունը:

Փորձերի արդյունքները թույլ են տվել ենթադրել, որ սարքը կարելի է կիրառել նաև մարդկային տարբեր հիվանդությունները կանխորոշելու նպատակով: Դա իրականացնելու համար Բիոարտ ընկերությունն այս պահին տվյալների անհրաժեշտ բազայի կարիք ունի: Համապատասխան մասնագետներն առաջիկայում կայցելեն բժշկական հաստատություններ և սարքով կգրանցեն տարբեր հիվանդություններ ունեցող մարդկանց, այնուհետև`առողջներին և կհամեմատեն գրանցված ազդանշանների տարբերությունները: Հավաքագրված ալիքները թույլ կտան ստանալ միջինացված ալիք, և, ըստ այդմ հասկանալ` մարդն առողջ է, թե հիվանդ: Որքան շատ մարդկանց տվյալներ լինեն, այնքան հավանականությունը մեծ է, որ ախտորոշումը կլինի ճշգրիտ: Հավաքագրված ինֆորմացիայից մասնագետները պետք է կարողանան եզրակացություններ անել կոնկրետ հիվանդությանների և դանց զարգացման փուլերի հետ կապված, որն արդեն արվում է բիոսկոպի համար մշակված հատուկ համակարգչային ծրագրի միջոցով:

Աշխատանքի այս փուլում ընկերության մասնագետներն առավել ուշադրություն են դարձնում այն հիվանդությունների հայտնաբերմանը, որոնցից շատ է մահացությունը և որոնք առավել ուշ փուլերում են ախտորոշվում` ուռուցքներ, սրտանոթային հիվանդություններ և այլն:

Բիոարտի հիմնադիր Ռաֆիկ Սարգսյանը վստահեցնում է, որ իրենք ամբողջությամբ հիմնվում են գիտական բազայի վրա և անգամ մարդկանց ու կենդանիների էներգետիկ դաշտը զգալու գործընթացը ոչ թե միստիկ, այլ գիտական հիմնավորում ունի:

Զրուցեց Արևիկ Չափարյանը