SpaceX ընկերությունը կրկին տիեզերք է արձակել Falcon 9 հրթիռ կրիչը, այս անգամ Իսպանիայի Hispasat 30W-6 հեռուստահաղորդակցման արբանյակի հետ։
Հրթիռի թռիչքը մեկնարկել է երեքշաբթի Կանավերալ հրվանդանի տիեզերակայանից։ Սկզբում նախատեսվում էր, որ մեկնարկը կիրականացվի փետրվարի վերջին, սակայն տեխնիկական պատճառներով այն հետաձգվել էր։
Falcon 9-ը ուղեծիր է դուրս բերել իսպանական Hispasat 30W-6 արբանյակը։ Այն նախատեսված է հեռուստատեսային ազդանշանի, տեսաազդանշանի հաղորդման, ինչպես նաև Հյուսիսային Ամերիկայում, Հարավային Ամերիկայում, Եվրոպայում և Հյուսիսային Աֆրիկայում լայնաշերտ ինտերնետ կապը հասանելի դարձնելու համար։
Ավելի վաղ SpaceX ընկերության ղեկավար Իլոն Մասկը հայտարարել էր, որ արբանյակը կդառնա ամենածանր բեռը, որ հրթիռը երբևէ ուղեծիր է դուրս բերել։ Արձակումից կես ժամ անց SpaceX ընկերությունը հաղորդել է Hispasat 30W-6–ի հաջողությամբ ուղեծիր դուրս գալու մասին։