Նորվեգիան մտադիր է Արկտիկայի ընդարձակ շրջաններում լայնաշերտ արբանյակային ինտերնետ հասանելիություն ապահովել։
«Այս նախագիծը կարևոր է Նորվեգիայի զինված ուժերի համար և կարող է բավարարել նաև մեր դաշնակիցների (ՆԱՏՕ–ի) պահանջները»,–հայտարարել է երկրի պաշտպանության նախարար Ֆրանկ Բակե Էնսենը։
Կայուն և արագ ինտերնետային կապը կապահովեն երկու արբանյակներ, որոնք 2022 թվականին նախատեսում է արձակել Space Norway AS ընկերությունը։
Սկանդինավյան թագավորության կառավարությունը խոստացել է ընկերությանը հատկացնել 1 մլրդ կրոն (շուրջ 130 մլն դոլար ներկա փոխարժեքով), եթե նրանք կարողանան լրացուցիչ միջոցներ ներգրավել մասնավոր ոլորտից և ապահովել նախագծի շահութաբերությունը: Նախատեսվում է, որ արբանյակները կծառայեն շուրջ 15 տարի։
Նորվեգիայի կառավարությունում նշում են, որ կապի վատ որակը Բևեռային շրջանում դժվարացնում է արտակարգ ծառայությունների աշխատանքը։
