Այսօր հանդիսավոր արարողությամբ բացվեց «Յուքոմի» օնլայն մասնաճյուղը: Հաղորդակցման ոլորտում նորարարությունների առաջատար «Յուքոմ» ընկերությունը ներկայացրեց ևս մեկ նախաձեռնություն, որը մեծապես կօգնի ցանցի բաժանորդներին ավելի արդյունավետ տնօրինել իրենց ժամանակը և օնլայն կառավարել իրենց «Յուքոմ» ծառայությունները:
Օնլայն մասնաճյուղի ստեղծմամբ «Յուքոմ» ընկերությունը նպատակ ունի առավել հեշտացնել իր բաժանորդների՝ մի շարք ծառայություններից օգտվելու հնարավորությունը: Առաջին անգամ Հայաստանում գործարկվում է մի ծառայություն, որի միջոցով «Յուքոմի» օգտատերերը, առանց «Յուքոմի» սպասարկման կենտրոն այցելելու, իրենց տանից կամ աշխատավայրից արագ կկարողանան կատարել իրենց անհրաժեշտ գործողությունները՝ կնքել կամ վերակնքել պայմանագիր, փոխել կամ թարմացնել «Յուքոմ» ծառայությունների փաթեթը, փոխել ինտերնետի սակագնային պլանը, ակտիվացնել Wi Fi ինտերնետային ծառայություն, կատարել առցանց վճարումներ և այլ գործողություններ:
«Ժամանակակից աշխարհում կյանքը շատ արագ է շարժվում առաջ, իսկ մարդուն ավելի ու ավելի քիչ ժամանակ է մնում՝ զբաղվելու իր սիրելի գործով, լինել տանը՝ մտերիմների ու ընկերների հետ: Յուրաքանչյուր անգամ ծառայությունների փոփոխության համար գրասենյակ այցելելը նշանակում է կորցնել ևս մի քանի ժամ: Մենք առաջարկում ենք մի նոր հնարավորություն՝ օգտվելով որից մարդիկ այլևս ստիպված չեն լինի երկար ժամանակ վատնել «Յուքոմի» ծառայությունների փոփոխման կամ վճարում կատարելու համար»,- նշել է «Յուքոմ» ընկերության տնօրեն Հայկ Եսայանը:
Ընկերության հասարակայնության հետ կապերի մասնագետ Նաիրա Կարմիրշալյանը ittrend.am-ի հետ զրույցում նշեց, որ օնլայն մասնաճյուղը կգործի ucom.am հասցեում, վճարումները հնարավոր կլինի անել ArCa, Visa, Mastercard քարտերով։ Ucom-ի ծառայություններից օգտվողները կկարողանան գրանցվել համակարգում իրենց ID-ով, որը տրվում է ընկերության բաժանորդ դառնալու դեպքում։
