«2018թ.՝ Հայաստանը 20 ամենանորարար երկրների շարքում» խորագիրը կրող Բիզնես ինովացիոն 3-րդ ֆորումն այս տարի տեղի կունենա նոյեմբերի 13-14-ը՝ Դիլիջան քաղաքի «Բեսթ Վեսթերն Փարադայզ» համալիրում:
Երկօրյա ինովացիոն ֆորումը հարթակ է, որտեղ կներկայացվի տեղական և համաշխարհային փորձը, կծավալվի գործնական քննարկում շահագրգիռ կողմերի մասնակցությամբ և կտրվեն համապատասխան լուծումներ 2018 թվականին Հայաստանը աշխարհի 20 ամենանորարար երկրների շարքում դիրքավորելու համար:
«Մենք մեր առջև բավականին հավակնոտ խնդիրներ ենք դրել 2018թ. Հայաստանը ամենանորարար երկրների շարքում տեսնելու ուղղությամբ: Ու թեպետ, ինչպես ցույց են տալիս վերջին տարիների ցուցանիշները, այդ ուղղությամբ առաջխաղացում կա, այնուհանդերձ նպատակին հասնելու համար կարևորագույն խնդիր է մնում մեր երկրում նորարարության համար բարենպաստ մթնոլորտ ու համապատասխան կրթության պայմաններ ձևավորելը: Կարծում եմ, առաջիկա դիլիջանյան ֆորումը և մասնավորապես հանրաճանաչ խոսնակների մասնակցությունը զգալիորեն կնպաստեն մեր առջև դրված նպատակների իրագործմանը»,-նշում է Բիզնես ինովացիոն ֆորումի կազմակերպիչ՝ Ինֆորմացիոն տեխնոլոգիաների ձեռնարկությունների միության (ԻՏՁՄ) գործադիր տնօրեն Կարեն Վարդանյանը:
Ինովացիոն ֆորումն ավանդաբար կանցկացվի Հայաստանի տեխնոլոգիական, կրթական և ձեռներեցության ոլորտների առաջատարների մասնակցությամբ։ Ֆորումին կմասնակցեն հայաստանյան և արտերկրյա տեխնոլոգիական, կրթական և ինովացիոն այլ ոլորտների շուրջ 200 մասնակիցներ, ՀՀ կառավարության և միջազգային կազմակերպությունների ներկայացուցիչներ:
Ինովացիոն ֆորումի թեմատիկ ուղղություններն են՝
- ինովացիոն էկոհամակարգեր,
- ինովացիա և կրթություն,
- ինովացիա և ձեռներեցություն։
Արդեն 3-րդ տարին անընդմեջ անցկացվող Բիզնես ինովացիոն ֆորումն ավանդաբար իրականացվում է ԻՏՁՄ-ի կողմից՝ ՀՀ վարչապետի բարձր հովանու ներքո և մասնակցությամբ: Ֆորումի գլխավոր հովանավորն է «ԲեթՔոնսթրաքթ» ընկերությունը:
