«ԱրմենՏել» ընկերությունը տեղեկացնում է, որ Հայաստանի ամբողջ տարածքում ընկերության բոլոր տեխնիկական համակարգերն աշխատել են անխափան ինչպես ամանորյա գիշերն, այնպես էլ հաջորդող հանգստյան օրերին: Խափանումներ չեն գրանցվել ոչ ֆիքսված և ոչ էլ բջջային ցանցերի աշխատանքում: Այս մասին տեղեկացնում են ընկերության մամլո ծառայությունից:
2012թ-ի դեկտեմբերի 31-ին և 2013թ-ի հունվարի 1-ն ընկած ժամանակահատվածում Beeline ցանցը սպասարկել է ավելի քան 11.7 մլն. զանգ: Նույն ժամանակահատվածում Beeline բջջային ցանցի բաժանորդներն ուղարկել են ավելի քան 600 հազար SMS հաղորդագրություն:
Նշենք, որ ընկերության տվյալների փոխանցման կապուղիներով վերը նշված ժամանակահատվածում ստացվել/փոխանցվել է ավելի քան 188 ՏԲ տվյալ: Այդ ծավալը գրեթե համարժեք է երեք միլիոն հատոր «Բրիտանիկա» (Britannica) պատկերազարդ հանրագիտարանի և գրեթե հինգ անգամ գերազանցում է ԱՄՆ Կոնգրեսի գրադարանում պահպանվող տեղեկատվության ծավալը:
