Այսօր կայացել է ՀՀ էկոնոմիկայի նախարարության և ԱՄՆ ՄԶԳ Ձեռնարկությունների զարգացման և շուկայի մրցունակության ծրագրի աշխատանքային քննարկում` ուղված Հայաստանում էլեկտրոնային առևտրի խթանման նպատակով նախարարության և ծրագրի կողմից մշակված օրենսդրական փոփոխությունների հանրային ներկայացմանն ու քննարկմանը:
Հանդիպման նպատակն էր թեմայի վերաբերյալ ծավալել երկխոսություն մասնավոր և հանրային ոլորտների ներկայացուցիչների միջև, ստանալ առաջարկություններ օրենսդրական փոփոխությունների փաթեթի վերաբերյալ:
Առաջարկվող օրենսդրական փոփոխությունները բխում են միջազգային լավագույն գործելակերպից: Օրենսդրական փոփոխություններն առաջարկվում են ՀՀ քաղաքացիական օրենսգրքում, «Էլեկտրոնային փաստաթղթի և էլեկտրոնային թվային ստորագրության մասին», «Արժութային կարգավորման և արժութային վերահսկողության մասին», «Սպառողների իրավունքների պաշտպանության մասին» և «Առևտրի և ծառայությունների մասին» ՀՀ օրենքներում: Առաջարկվող փոփոխությունների նպատակն է խթանել էլեկտրոնային առևտուրը Հայաստանում: Փոփոխությունների արդյունքում կստեղծվի բարենպաստ դաշտ օտարերկրյա գործընկերների հետ էլեկտրոնային գործարքների կնքման և էլեկտրոնային ստորագրության կիրառման համար: Էլեկտրոնային առևտրի զարգացած համակարգը կխթանի նաև երկրում էլեկտրոնային տարբեր ծառայությունների տրամադրումը:
Քննարկմանը մասնակցեցին մասնավոր հատվածի, Ինֆորմացիոն տեխնոլոգիաների ձեռնարկությունների միության և անդամ ընկերությունների ներկայացուցիչներ, ինչպես նաև ՀՀ էկոնոմիկայի նախարարության, Կենտրոնական բանկի, Տրանպորտի և կապի նախարարության և ՀՀ ԿԱ Պետական եկամուտների կոմիտեի ներկայացուցիչները: Քննարկման ընթացքում մասնակիցներին ներկայացվեցին օրենսդրական փոփոխությունների փաթեթում ներառված իրավական ակտերի և նախագծերի դրույթները: «Օրենսդրության կարգավորման ազգային կենտրոն»-ի ներկայացուցիչը ներկայացրեց մաքսային ոլորտին վերաբերող փոփոխությունների առաջարկները: Մասնակիցները քննարկեցին էլեկտրոնային առևտրին առնչվող խնդիրները` կարևորելով առաջարկվող բարեփոխումները:
