Facebook ընկերությունը հաստատել է օգտատերերի տվյալների փոխանցման վերաբերյալ լուրերը։ Ընկերությունը հաստատել է 4 չինական ընկերության անուն` Huawei, Lenovo, OPPO և TCL of China։
«Facebook-ը աշխատել է ԱՄՆ-ի բազմաթիվ այլ տեխնոլոգիական ընկերությունների և չինական այլ արտադրողների հետ` հեռախոսներում ծառայությունները ինտեգրելու համար», — ասել է Facebook- ի բջջային սարքերի արտադրողների հետ գործընկերային հարաբերությունների հարցերով փոխնախագահ Ֆրանսիսկո Վարելա:
Նա ընդգծել է, որ հենց սկզբից Facebook-ում ինտեգրման ընթացքը վերահսկվել է և սոցցանցը հաստատել է բոլոր տարրերը:
«Կոնգրեսի հետաքրքրվածությունը հաշվի առնելով` ուզում ենք հստակեցնել, որ Huawei-ի հետ նման ինտեգրացման արդյունքում ողջ տեղեկատվությունը պահպանվել է սարքում, այլ ոչ թե Huawei-ի սերվերներում», — գրել է նա:
Ավելի վաղ The New York Times-ը հաղորդել էր, որ 2007 թվականից Facebook-ը օգտատերերի և նրանց ընկերների անհատական տվյալներին հասանելիություն ունենալու մասին համաձայնագրեր է կնքել առնվազն 60 ընկերությունների հետ, որոնք արտադրում են սմարթֆոններ եւ այլ բջջային սարքեր: Facebook-ը չի հերքել նման հարաբերությունների գոյությունը, սակայն պնդել է, որ բոլոր նման համաձայնագրերը համապատասխանում են ընկերության կանոններին եւ իշխանությունների պահանջներին:
