Ամերիկյան Twitter ընկերության հիմնադիր և գործադիր տնօրեն Ջեք Դորսին լքել է պաշտոնը։ Նրա պաշտոնը կստանձնի տեխնիկական տնօրեն Պարագ Ագրավալը։ Դորսին կմնա տնօրենների խորհրդի կազմում մինչև 2022 թվականը՝ իր լիազորությունների ավարտը:
Դորսին և Twitter-ի տնօրենների խորհուրդը նրա հեռանալուն նախապատրաստվել են անցյալ տարվանից։ 2020 թվականի սկզբին Elliott Management ներդրումային հիմնադրամը, որը համարվում է ակտիվ ներդրող և մասնաբաժին ունի Twitter-ում, հորդորել էր Դորսիին հեռանալ Twitter-ի գործադիր տնօրենի կամ Square ընկերության գործադիր տնօրենի պաշտոնից:
Ըստ Elliott Management-ի՝ Դորսին չի կարող միաժամանակ երկու ընկերություններին հավասար ուշադրություն դարձնել։
Սեփական սոցցանցում Դորսին հրապարակում է կատարել, որտեղ ներկայացրել է իր հրաժեշտի նամակը՝ ուղղված ընկերության աշխատակիցներին և գրել. «Վստահ չեմ, որ որևէ մեկը լսել է, բայց ես հեռացել եմ Twitter-ից»:
not sure anyone has heard but,
I resigned from Twitter pic.twitter.com/G5tUkSSxkl
— jack⚡️ (@jack) November 29, 2021
Ջեք Դորսին Twitter-ը հիմնադրել է 2006-ին, իսկ Square-ը՝ 2009-ին։
Նախկինում՝ 2008 թվականին, նա արդեն լքել էր Twitter-ի գործադիր տնօրենի պաշտոնը, սակայն այդ պաշտոնը կրկին ստանձնել էր 2015 թվականին։