Այսօր Երևանում կայացել է Huawei ընկերության շնորհանդեսը

Այսօր Երևանում կայացել է Huawei ընկերության շնորհանդեսը

Այսօր՝ հուլիսի 10-ին, Երևանում կայացել է աշխարհահռչակ Huawei կազմակերպության շնորհանդեսը։ Միջոցառման բանախոսները՝ Huawei Russia Enterprise-ի դեպարտամենտի տնօրեն Ցաո Չոնգը (Cao Chong) և Huawei Armenia-ի տնօրեն Դինգ Բինը (Ding Bin) ներկայացրել են ընկերության գործունեությունը Հայաստանի ՏՏ ոլորտի մասնագետներին: Շնորհանդեսին մասնակցել են նաև Enterprise-ի ներկայացուցիչ Հայկ Հակոբյանը, Terminal-ի ներկայացուցիչ Սվետլանա Բաղդասարյանը, «Մոբլիօս» ՍՊԸ-ի (Huawei-ի պաշտոնական դիստրիբյուտորը Հայաստանում) տնօրեն Տաթև Սարգսյանը, ինչպես նաև IT և IP ոլորտի մասնագետներ Ռուսաստանից:

«Հույս ունենք, որ Huawei Հայաստանը կդառնա հզոր նորարարական կենտրոն: Մենք հավատում ենք Հայաստանին, քանի որ հայերը շատ խելացի ժողովուրդ են: Huawei-ը զարգանում է երեք ուղղություններով՝ կապի օպերատորներ, կորպորատիվ շուկա և մոբայլ սարքեր: Մենք՝ որպես ասիական ընկերություն, եվրոպական և ամերիկյան ընկերությունների հետ մրցում ենք ոչ միայն գնի, այլև բարձրորակ արտադրանք ներկայացնելու առումով: Բազմաթիվ մրցակիցներ ունենք շուկայում, սակայն համոզված եմ, որ Հայաստանում կզբաղեցնենք մեր տեղը՝ հաշվի առնելով այն, որ պատրաստվում ենք հեղափոխություն բերել այստեղ»,- նշել է Huawei Armenia-ի տնօրեն Դինգ Բինը:

IMG_7811

«Գուցե վերջին 20 տարիներին տպավորություն է ստեղծվել, թե Չինաստանը միայն ցածրորակ պրոդուկտների արտադրությամբ է զբաղվում, սակայն Huawei-ն իր օրինակով փորձում է ցույց տալ, որ դա այլեւս այդպես չէ: Ընկերությունը գիտի, թե ինչպես միտումներ են սպասվում առաջիկա տասնամյակում և այս առումով մենք հստակ ռազմավարություն ենք մշակել»,- ասել է Huawei Russia Enterprise-ի դեպարտամենտի տնօրեն Ցաո Չոնգը: «Մեր համագործակցության շնորհիվ մեկ տարի առաջ Երեւանում՝ Թումանյան 27 հասցեում, բացվել է Huawei-ի՝ ԱՊՀ-ում առաջին եւ դեռեւս միակ սրահը: Մեր գլոբալ նպատակն այս պահին Հայաստանում Huawei-ի ճանաչմանը հասնելն է»,- իր հերթին ասել է Հայաստանում Huawei-ի պաշտոնական դիստրիբյուտոր «Մոբլիօս» ՍՊԸ-ի տնօրեն Տաթեւ Սարգսյանը: Միջոցառման ընթացքում պարբերաբար իրականացվել են խաղարկություններ, որոնց հաղթողներն արժանացել են Huawei ընկերության տարբեր արժեքավոր մրցանակների:

Հավելենք, որ Huawei ընկերությունը համարվում է աշխարհում հեռահաղորդակցության ոլորտի առաջատարներից մեկը: Այն հիմնադրվել է Չինաստանում 1987թ.: Ընկերությունն այժմ ամբողջ աշխարհում ունի 150 հազարից ավելի աշխատակիցներ և ներկայացուցչություններ ավելի քան 170 երկրներում: Այն մասնագիտացած է ոլորտի մի շարք ճյուղերում` սարքավորումների արտադրություն, էլեկտրոնային կառավարում, հեռահաղորդակցական համակարգեր և այլն: Huawei Հայաստանը գործում է 2011-ից:

Իսկ ինչպե՞ս է ճիշտ արտասանվում Huawei անունը։ Եթե հետաքրքրեց, ապա այցելեք այստեղ։

Բաժիններ: Հայաստան