Windows 10-ն արդեն սկսել է ավտոմատ տեղադրվել շատ օգտագործողների համակարգիչներում, բայց շատերս դեռ սպասում ենք Microsoft-ի նոր օպերացիոն համակարգին։ Բանն այն է, որ Microsoft-ը պլանավորել է Windows 10-ը տեղադրել ալիքներով, և եթե Ձեր համակարգն ասում է, որ թարմացման համար ամեն ինչ պատրաստ է, սակայն պետք է դեռ սպասել, նշանակում է` Ձեր ալիքի հերթը դեռ չի հասել:
Անգամ եթե Ձեր Windows 10-ի տեղադրման ծրագիրն ասում է, որ կտեղեկացնի թարմացման պատրաստ լինելու մասին, Դուք կարող եք ստիպել ձեր Windows 7-ին կամ Windows 8-ին սկսել ներբեռնել Windows 10-ի տեղադրման ֆայլերը: Իսկ ինչպես դա անել․ ներկայացնում ենք մանրամասն ուղեցույցը։
Առաջինը` մուտք գործեք “C:\Windows\SoftwareDistribution\Download” պանակի մեջ և ջնջեք այնտեղից բոլոր ֆայլերը (եթե Ձեր Windows-ը տեղադրված է ոչ C: դիսկի վրա, ապա մուտք գործեք համապատասխան պանակի մեջ): Այս քայլով Դուք Windows Update-ը կբերեք զրոյական վիճակի:
Ապա բացեք Windows Update-ը` սեղմելով Windows կոճակն ու որոնելով “Windows Update”։
Բացեք command prompt-ը որպես ադմինիստրատոր (“Run as administrator”):
Հավաքեք հետևյալ տեքստը՝ wuauclt.exe /updatenow, բայց դեռ Enter մի սեղմեք, սա հրաման է, որը կստիպի Windows Update-ին` կրկին ստուգել թարմացումները:
Վերադարձեք բացված Windows Update-ի պատուհանին և սեղմեք “Check for updates” պատուհանի ձախ մասից: Պետք է հայտնվի “Checking for updates…” գրությունը, ինչպես որ նկարում է:
Անմիջապես դրանից հետո բացեք command prompt-ը և սեղմեք Enter:
Քիչ անց կտեսնեք, թե ինչպես է Windows-ը սկսել բեռնել թարմացումները:
