Չնայած նրան, որ դպրոցականների համար երկար սպասված ամառային արձակուրդներ են, միեւնույն է արմաթցիները շարունակաբար ձեռներեցության եւ կրթության պրպտումների մեջ են: Նրանք դեռ դպրոցականներ են, բայց իրենց գաղափարներով մրցելու են Սեւան Ստարտափ Սամմիթի մասնակից փորձառու երիտասարդների հետ:
Արմաթցիների 3 թիմ ստարտափերներ մասնակցում են Սեւան Ստարտափ Սամմիթին (SSS18), 2 խմբակ էլ ներկայացված են ցուցահանդեսային հատվածում:
Արմաթի խմբավար Նարինե Մեսրոպյանն այնտեղ է Աշտարակի տարբեր դպրոցների աշակերտուհիների հավաքական թիմով: Նրանք ներկայացնում են իրենց ստեղծած 1 of U հավելվածը, որը կոչված է բարելավելու աուտիկ երեխաների կյանքը, նրանց հաղորդակցումն ու շփումը: 1 of U hավելվածում առկա է նաեւ կրթական բաժին: Նշենք նաեւ, որ այս թիմն իր՝ Safe Internet բջջային հավելվածով մասնակցել է Technovation Challenge-ին և արժանացել Գրան պրի մրցանակի: Թիմում չորս աղջիկներ են, նրանցից Թերեզա Թումանյանը Արմաթի սան է, ով նշված ծրագրերի կոդի հեղինակն է:
Ձեռներեց արմաթցիների մեկ այլ խումբ էլ եկել է Արցախից: Նորշենի արմաթցի սաների թիմակիցներն են Արա Հարությունյանը (Արմաթի խմբավար, «Դասավանդի՛ր, Հայաստան» ծրագրի մասնակից) և Անահիտը, ով նույնպես «Դասավանդի՛ր, Հայաստան» ծրագրի մասնակից է:
Ի պատասխան այն հարցին, թե ով է աշակերտների համար ոգեշնչման աղբուր, երեխաները միաբերան նշեցին իրենց խմբավար Արա Հարությունյանին:
Նրանց պրոդուկտը ստեղներով մեթոդական լսարան է, հիմնված հանրահայտ բրեյնրինգ ինտելեկտուալ խաղի ստեղների սեղման ինտերակտիվ համակարգի վրա: ՆորՇենԼաբ թիմը համակարգը թվայնացնում է և սինքրոնացնում հավելվածի հետ, որի միջոցով ուսուցիչները կարող են գնահատել աշակերտներին ու ունենալ ինֆորմացիայի բազա: Գնահատման մեթոդն էլ նախատեսել են սմայլիկներով համակարգ, այլ ոչ թե թվանշան: Պրոդուկտի պրոտոիպը պատրաստ է, որն էլ կներկայացնեն SSS18-ի շրջանակում: Կրթական ծրագրերի բաժնում լավագույնի համար մրցելու են ընդհանուր թվով 13 թիմ:
ՆորՇենԼաբ թիմին շուկա դուրս գալու համար անհրաժեշտ են ներդրումներ: Հավելենք նաև, որ այս գաղափարը հոկտեմբերին հաղթող է ճանաչվել Awesome Foundation-ի կողմից ու արժանացել դրամական պարգևի:
Արմաթ ստարափերների մյուս թիմում Թալինի դպրոցականներն են՝ 14-ամյա Արմանը, 15-ամյա Վիգենն ու 16-ամյա Բաբկենը: Սամմիթում նրանց հետ է նաև Peace Corps կամավոր Մարվինը, ով օգնում է դպրոցականներին պատրաստվել իրենց գաղափարի ներկայացմանը: Ի դեպ, Մարվինը դպրոցականների հետ աշխատում է Վորլդ Վիժն Արմենիայի նախաձեռնության շրջանակում: Արմաթցի սաները անգլերեն են հաղորդակցվում Մարվինի հետ և միաժամանակ բարելավում անգլերենը:
Թալինի արմաթցիներն այստեղ ներկայացնում են իրենց VR Surgery հավելվածը. VR ակնոցների՝ Oculus rift-ի միջոցով հնարավոր կլինի տեսնել օրգանիզմը և վիրահատության ենթակա հատվածը: VR Surgery-ին նախատեսված է սկսնակ բժիշկների համար, որը հնարավորություն կտա պրակտիկ գիտելիքներ ստանալ առանց թանկարժեք մեթոդների կիրառության: Տղաներն արդեն ունեն մարմնի 3D մոդելը: Նրանք ներդրումներ են փնտրում պրոյեկտի զարգացման համար:
Արմաթցի սաները գոհունակություն հայտնեցին իրենց խմբավար Եղիշե Ամիրյանին, ում խորհուրդների ու աշխատանքի միջոցով են տղաները միավորվել ու տարբեր պրոյեկտներ ստեղծում: Նրանց է պատկանում նաև Zoomar հավելվածը: Վերջերս էլ Ucom-ի աջակցությամբ այն ներկայացրել են Մինսկում կայացած EMERGE միջազգային ինովացիոն կոնֆերանսին:
Սեւանի եւ Գյումրու Արմաթ ինժեներական լաբորատորիաները՝ ի դեմս խմբավարներ Սոնա Հովհաննիսյանի ու Հասմիկ Առաքելյանի SSS18-ի ցուցահանդեսայն տաղավար ունեն: Նրանք շփվում են մասնակիցների հետ, պատմում լաբորատորիաների առաքելության մասին եւ սեփական փորձով կիսվում այցելուների հետ: Դպրոցականները եռաչափ տպիչով տարբեր մոդելներ են տպագրում եւ վաճառում, ստացել են նաեւ համագործակցության առաջարկներ: Մինչ մենք զրուցում էինք պատանի ձեռներեցների հետ, նրանք պատվերներ ստացան տպագրելու Սեւան Ստարտափի Սամիթի լոգոտիպը: Վաճառքից գոյացած գումարը դպրոցականները հատկացնելու են իրենց լաբորատորիայի ֆոդնին:
Հիշեցնենք, որ SSS18-ին մասնակցում են շուրջ 1000 ձեռներեց 35 երկրից , այդ թվում 120 ստարտափ թիմեր, ներդրողներ, վենչուրային ֆոնդերի ներկայացուցիչներ, մենթորներ, բիզնես փորձագետներ եւ ոլորտի ներկայացուցիչներ։ Ստարտափների համար նախատեսված են բազմաթիվ ուսուցողական միջոցառումներ եւ մրցույթներ։
Ծրագրի ներդրումային ֆոնդը $100 հազ. է, որը կտրվի ծրագրի մասնակից մեկ կամ երկու ստարտափի, իսկ մրցանակային ֆոնդը կկազմի $50 հազ.:
Հավելենք, որ Ինֆորմացիոն տեխնոլոգիաների ձեռնարկությունների միությունը (ԱՏՁՄ) ինչպես նախորդ տարի, այս տարի նույնպես հանդիսանում է «Սեւան Ստարտափ Սամմիթ»-ի գործընկերը: ԱՏՁՄ-ն կհամաֆինանսավորի հաղթողների և մյուս պրոյեկտների մասնակցությունը ԴիջիԹեք 2018 տեխնոլոգիական միջազգային ցուցահանդեսի մասնակցությունը: ԴիջիԹեքը տեղի կունենա հոկտեմբերի 5-7-ը Երևան էքսպո կենտրոնում:
