ՀՀ արտաքին գործերի նախարար Զոհրաբ Մնացականյանը պաշտոնական այցով մեկնել էր Եթովպիա, նրա ղեկավարած պատվիրակության հետ աֆրիկական երկիր էր հյուրընկալվել նաև Ձեռնարկությունների Ինկուբատոր Հիմնադրամի (ՁԻՀ) բիզնես զարգացման ղեկավար Ամալյա Եղոյանը:
Եթովպիայում Ամալյա Եղոյանը հանդիպել է Եթովպիայի Նորարարության ևՏեխնոլոգիայի նախարար Գետահուն Մեկուրիայի հետ: Համագործակցության եզրերն արդեն գծանշված են՝ Հայաստանն ու Եթովպիան կհամագործակցեն տեխնոլոգիական և ճարտարագիտական ոլորտներում։ Ձեռնարկությունների Ինկուբատոր Հիմնադրամը Եթովպիայում փոխըմբռնման հուշագիր է ստորագրել Ադիս Աբեբայի համալսարանի համակարգչային գիտությունների բաժնի հետ:
Ամալյա Եղոյանը նաև հանդիպումներ է ունեցել նաև Աֆրիկայի հարցերով ՄԱԿ-ի Տնտեսական հանձնաժողովի գլխավոր քարտուղարի տեղակալ Ջիովանի Բիհայի հետ:
«Հուշագրի ստորագրումը Եթովպիա այցի կարևորագույն ձեռքբերումներից էր: Այն նախատեսում է երկու երկրներում համատեղ կրթական, հետազոտական եւ ակադեմիական ծրագրերի անցկացում, տեղեկատվական տեխնոլոգիաների ոլորտում երկրների խաչաձեւ համագործակցություն, համատեղ նախագծերի իրականացում, այդ թվում` Ադիս Աբեբայի համալսարանում Ազգային ինժեներական լաբորատորիաների մոդելի (ANEL) ներդրում, ուսանողների եւ դասախոսների փոխանակում, համատեղ նախաձեռնությունների փոխադարձ խթանում եւ այլն»,- նշել է Ամալյա Եղոյանը:
