ԱՄՆ օդագնացության և տիեզերական տարածության հետազոտությունների ազգային գործակալությունը (ՆԱՍԱ) Մարս մոլորակի կապույտ ավազաթմբերը պատկերող ուշագրավ լուսանկարներ է հրապարակել, գրում է Independent-ը։
Համեմատության համար ՆԱՍԱ-ն հայտնել է, որ լուսանկարում պատկերված ավազաթմբերը զբաղեցնում են ԱՄՆ-ի երկրորդ խոշորագույն նահանգի՝ Տեխասի մեծության տարածք (695 662 քառակուսի կմ)։
Նշվում է՝ լուսանկարներն արվել են 2002 թվականի դեկտեմբերից 2004 թվականի նոյեմբերն ընկած ժամանակահատվածում՝ ՆԱՍԱ-ի Mars Odyssey Orbiter սարքի միջոցով։
Ավազաթմբերի տարբեր գույները պայմանավորված են ջերմային տատանումներով, մասնավորապես՝ կապույտ երանգները պատկերում են ցուրտ շրջանները, դեղին և նարնջագույն երանգները՝ տաք շրջանները։