ԱՄՆ-ի երկու ֆինանսական ընկերություններ դատարան են դիմել՝ Twitter միկրոբլոգային ծառայությունից պահանջելով $124 միլիոն դոլար՝ բորսայում ակցիաների առանջային տեղաբաշխման ժամանակ արժեթղթերի վաճառքի խափանման համար: Հաղորդում է Bloomberg գործակալությունը:
Precedo Capital Group և Continental Advisors ընկերությունները մեղադրել են Twitter-ին այն բանում, որ միկրոբլոգային ծառայությունը սկզբում գործարք է պատրաստել իր աշխատակիցներին և հին ներդրողներին մոտ 278 միլիոն դոլար արժողությամբ ակցիաներ վաճառելու ուղղությամբ, սակայն որոշ ժամանակ անց չեղյալ է հայտարարել գործարքը:
«Twitter-ն ընդհանրապես նպատակ չի ունեցել ավարտին հասցնել գործարքը, այլ միայն նպատակ է ունեցել ստիպել Precedo Capital-ին և Continental Advisors-ին արհեստականորեն մասնավոր շուկա ստեղծել, որպեսզի հետո հայտարարի, որ այդ շուկայում իր ակցիաները վաճառվել են 19 դոլարով», — ասվում է հայցի մեջ: Հայցվորները պահանջել են 124 միլիոն դոլար՝ որպես տուգանք և կատարված ծախսերի փոխհատուցում:
Twitter-ի ներկայացուցիչ Ջիմ Պրոսերը, սակայն, հերքել է ընկերության հասցեին արված մեղադրանքները: Հիշեցնենք, որ ս.թ. հուլիս-սեպտեմբեր ամիսներին Twitter-ի եկամուտը գրեթե կրկնապատկվել է՝ կազմելով 168,6 միլիոն դոլար:
