«Թեքնոլոջի ընդ Սայնս Դայնամիքս» (TSD) ընկերությունը թողարկել է միանգամից երկու խաղ՝ «Viking sail» և «Carrot Thief»: Գազարներ գողացող ճագար և նավ, որի ընթացքը կախված է ձեր փչելուց: Նոր խաղերը նախատեսված են տարբեր նախասիրություններ ունեցող մարդկանց համար: Դրանք անվճար հասանելի են iOS և Android համակարգերի համար:
Viking sail (Android, iOS)
Շոգ ամառ, սակայն ոչ վիկինգների համար։ Առջևում կարևոր առաքելություն է, որի ճանապարհին նրանց սպասվում են բազմաթիվ խոչընդոտներ։ Խաղալու համար անհրաժեշտ է հավաքել բոլոր ուժերը և փչել նավակի վրա, ինչի շնորհիվ նավը կսկսի ավելի արագ ընթանալ, իսկ նավարկելուն զուգահեռ խաղացողը հնարավորություն կունենա վայելելու Վիկինգների պատմական վայրերը:
Վիկինգների նավին հետապնդում է ամենամեծ վտանգը՝ հսկա ու զարհուրելի հրեշը: Հարկավոր է խույս տալ նրանից և առաջ շարժվել՝ հավաքելով ավելի մեծ արագություն: Որքան առաջ գնաս, այդքան նավարկության համար ավելի մեծ հնարավորություններ կբացվեն քո առջև: Փչելուց հոգնելու դեպքում հնարավոր է անցնել ավտոմատ ռեժիմի և վարել հեռախոսի սենսորներով:
Carrot Thief (Android, iOS)
Այս խաղի գլխավոր հերոսը ճագարն է, որին պետք է օգնել գազարներ հավաքել, վաստակել միավորներ և հաղթահարել խոչընդոտները՝ հաջորդ փուլ անցնելու համար: Այն ունի հանելուկային տարրեր, որոնք փոխում են խաղի ընթացքը՝ ստեղծելով նոր իրականություն:
Խաղը բաղկացած է աստիճանաբար բարդացող 30 աշխարհներից։ Եթե հաջողությամբ ավարտում եք Carrot Thief-ի բոլոր աշխարհները, ապա հնարավորություն եք ստանում ստեղծել սեփական աշխարհները՝ գործի դնելով երևակայությունն ու տրամաբանությունը: Նոր աշխարհներով կարելի է կիսվել ընկերների հետ։
Նունե Գրիգորյան
