Հաճա՞խ եք տանը կորցնում բանալիները, դրամապանակն ու նույնիսկ պայուսակը։ Ստեղծվել է Tile անունով գաջեթ, որը կօգնի գտնել կորցրած իրերը։ Այն ամրացվում է իրերի վրա, սինքրոնացվում է սմարթֆոնի հետ և ցույց է տալիս, թե որտեղ է գտնվում։
Tile-ն իրերին ամրացնելուց հետո պետք է տեղադրել համապատասխան հավելվածը, որի iOS տարբերակն արդեն պատրաստ է, իսկ Android-տարբերակը կթողարկվի շուտով։ Հավելվածին կարելի է միացնել մինչև ութ Tile սարք՝ նախապես հավելվածում տալով դրանց անուններ՝ չշփոթելու համար, օրինակ՝ բանալի, հեռախոս, պայուսակ և այլն։
Կորած իրը գտնելու համար պետք է հավելվածում սեղմել Find կոճակը, և ծրագիրն անմիջապես ցույց կտա՝ որքան հեռու կամ մոտ եք գտնվում տվյալ իրից։ Երբ սկսում եք մոտենալ, Tile-ը ձայն է հանում, որպեսզի ավելի հեշտ լինի այն գտնել։ Սակայն սարքն աշխատում է 30 մետր հեռավորության վրա։
Tile-ը կարելի է պատվիրել tileapp.com կայքում։ Մեկ Tile-ի արժեքը 20 դոլար է, սակայն որքան շատ գնեք, այնքան ավելի մատչելի կլինի։ Նշենք, որ սարքը լիցքավորել հնարավոր չէ, այն մեկ տարի օգտագործելուց հետո սպառվում է, և պետք է արդեն փոխարինել այն նորով։
Աղբյուրը՝ Lifehacker.ru