ԱԺ-ն ընդունել է ՏՏ ընկերությունների նոր արտոնությունների մասին օրենքը: Այսօր խորհրդարանը 2-րդ և վերջնական ընթերցմամբ ընդունեց ՏՏ ընկերությունների նոր արտոնությունների մասին կառավարության օրինագիծը:
Ըստ որի՝ սթարթափները նախկին 3-ի փոխարեն 5 տարով կստանան հարկային արտոնություններ: Մինչև 30 աշխատակից ունեցող սկսնակ ՏՏ ընկերություններն ազատվում են մեծ թվով հարկերից, այս օրենքը գործում էր դեռևս 2015-ից: Այդ ընկերությունները պետք է վճարեն միայն 10 տոկոս եկամտահարկ:
Օրենքի գործունեության ընթացքում հարկային արտոնություններ են ստացել 178 ստարտափեր, որոնք 865 աշխատատեղ են ստեղծել:
178 ստարտափերի ընդհանուր շրջանառությունը կազմում է 3 մլրդ 993 մլն դրամ (մոտ 8,2 մլն դոլար), որի 90%-ն արտահանմանն է բաժին ընկել: Ձեռնարկությունները վճարել են 158,4 մլն դրամի եկամտահարկ:
Նշենք, որ «Տեղեկատվական տեխնոլոգիաների ճյուղում պետական աջակցության մասին» օրենքում համապատասխան փոփոխությունների օրինագիծը ընդունվեց 87 կողմ և 1 ձեռնպահ ձայներով:
