Հայ աշակերտուհիները հաղթել են Technovation 2017 միջազգային մրցույթում

Հայ աշակերտուհիները հաղթել են Technovation 2017 միջազգային մրցույթում

Այս տարի Հայաստանն առաջին անգամ մասնակցել է Technovation Challenge միջազգային մրցույթին: Կարբիի դպրոցի One Step Ahead ավագ թիմը «Կրթություն» անվանակարգում հաղթող է ճանաչվել Armenian Sign Language հավելվածով: Թիմը օգոստոսի 7-11-ը կմասնակցի ԱՄՆ-ի Սիլիկոնյան հովտում Համաշխարհային գագաթաժողովին և կստանա իր մրցանակը։

Ուսուցիչ-մենթոր Վարդանուշ Հովհաննիսյանի գլխավորությամբ՝ Սոնա Ավետիսյանի, Վարդանուշ Նազարեթյանի, Վիոլետա Մկրտչյանի, Սվետլանա Դավթյանի, Աղավնի Հակոբյանի ստեղծած Armenian Sign Language (Հայերեն ժեստերի լեզու) բջջային հավելվածը կօգնի հասարակության մեջ լսող և լսողության խնդիրներ ունեցող անձանց հաղորդակցման խնդիրը լուծել: Այն պարզ կառուցվածք ունի: Առանձին կոճակներով տարբերակված են թեմաները: Թվերը և այբուբենը ներկայացված են իրենց համապատասխան ժեստերի նկարներով, մյուս ժեստերը ցուցադրվում են տեսանյութերով, նկարներով: Հասանելի է 2 լեզվով՝ հայերեն և անգլերեն: Ձեռք բերված գիտելիքները հնարավոր է ստուգել և ամրապնդել «խաղի» միջոցով, որը ճիշտ պատասխանների դիմաց տալիս է միավորներ:

 

Այս տարի Հայաստանի դպրոցների 10-ից 18 տարեկան աշակերտուհիները հնարավորություն ունեցան մասնակցելու աշխարհի խոշորագույն տեխնոլոգիական ձեռներեցության “Technovation” ծրագրին: Ծրագիրը նախատեսում էր 12 շաբաթյա ուսուցում: Ուսուցման ընթացքում աղջիկները սովորեցին բացահայտել, վեր հանել որևէ սոցիալական խնդիր իրենց համայնքում, և պատրաստել բջջային հավելված` լուծելու այդ խնդիրը:

Շուրջ 11 000 աշակերտուհիներ, ավելի քան 100 երկրներից մասնակցեցին Technovation 2017 ծրագրին:

Հայաստանից մասնակցեցեին 214 աշակերտուհիներ, ձևավորվեցին 36 թիմեր, Հայաստանյան մրցույթի կիսաեզրափակիչ դուրս եկան 22 թիմեր: Technovation Armenia ծրագրի տարածաշրջանային դեսպանն էր «Կանայք և տեղեկատվական հասարակությունը» ՀԿ նախագահ Նարինե Աբազյանը:

Technovation Armenia ծրագրի կիսաեզարփակիչ անցած 22 թիմերից ժյուրին որպես Հայաստանյան մրցույթի հաղթող ընտրեց վեց թիմ` երեք ավագ և երեք կրտսեր խմբերից: Վեց թիմերից էլ միջազգային կիսաեզրափակիչ մրցույթին մասնակցեցից մեկ ավագ թիմ և երկու կրտսեր թիմեր: Կարբիի դպրոցի One Step Ahead ավագ թիմը, միջազգային կիսաեզրափակիչում  մրցելով աշխարհի 27 երկրներից ներկայացված 99 թիմերի հետ, «Կրթություն» անվանակարգում հաղթող է ճանաչվեց Armenian Sign Language հավելվածով:

Կարևորելով երիտասարդների դերը Հայաստանի ՏՀՏ ոլորտի զարգացման մեջ և իրենց ներգրավումը միջազգային մրցույթներում, ՏՀՏ գործատուների միության անդամ Յունիքոմփ ընկերությունը հովանավորել է մրցույթը՝  տրամադրելով հայաստանյան մրցույթի ավագ և կրտսեր թիմերի առաջին և երկրորդ տեղերի մրցանակները, և կատարելով թիմերի աշխատանքների գնահատում՝ որպես ժյուրիի անդամ։

Technovation Armenia ծրագիրը իրականացրել են Կրթության ազգային ինստիտուտը և  «Կանայք և տեղեկատվական հասարակությունը» ՀԿ-ն: Ծրագրին աջակցել և հովանավորել են ՄԱԿ-ի հայաստանյան գրասենյակը, Հայաստանի ամերիկյան համալսարանը, Տեղեկատվական և հաղորդակցության տեխնոլոգիաների գործատուների միությունը, Սինոփսիս Արմենիա ընկերությունը, Յունիքոմփ ընկերությունը և Ձեռնարկությունների ինկուբատոր հիմնադրամը: