Ռոբոտները նույնպես մրցել են ձմեռային օլիմպիական խաղերի ընթացքում (տեսանյութ)

Ռոբոտները նույնպես մրցել են ձմեռային օլիմպիական խաղերի ընթացքում (տեսանյութ)

Այս օրերին Հարավային Կորեայում ընթացող Օլիմպիական խաղերի ընթացքում մրցությանը մասնակցում են նաև ռոբոտները, որոնց համար առանձին կազմակերպվել է դահուկասահքի մրցույթ։

Ski Robot Challenge–ին մասնակցել է 7 թիմ աշխարհի տարբեր երկրների համալսարաններից, հետազոտական լաբորատորիաներից և մասնավոր ընկերություններից։ Գլխավոր մրցանակը 10 հազար դոլար է սահմանվել, գրում է The Verge–ը։

Մրցույթի կանոնների համաձայն` ռոբոտները պետք է ունենային 50 սմ–ից ոչ պակաս հասակ, 2 ոտքի վրա ինքնուրույն կանգնելու կարողություն և օժտված լինեին ինքնավար շարժիչով։ Սենսոների օգնությամբ ռոբոտները պետք է կողմնորոշվեին և շրջանցեին ճանապարհին հանդիպող դրոշակները, ինչպես նաև չխախտեին դրանց հերթականությունը։ Նրանք պետք է հաղթահարեին սկսնակների համար նախատեսված 80 մետր երկարությամբ ուղի, սակայն նշվում է, որ ոչ բոլոր ռոբոտներին է հաջողվել հասնել եզրագծին։

Մասնակիցների համար խնդրներ է առաջացրել օդի ցածր ջերմաստիճանը, որը խոչընդոտել է մեխանիզմների բնականոն աշխատանքին։

Հաղթող է ճանաչվել MiniRobot Corp. ընկերության մշակած Taekwon-V ռոբոտը, որն իր անունն ստացել է 70–ականներին հանրահայտ հարավկորեական մուլտֆիլմի հերոս–ռոբոտի պատվին։ Ի դեպ, այս ռոբոտը իր հասակով ամենացածրն է եղել` 75 սմ։